Ռուսաստանը Սլովակիայից պահանջել է վերադարձնել «Սպուտնիկ V» պատվաստանյութի ամբողջ խմբաքանակը, քանի որ այդ երկիրը խախտել է պայմանագիրը, հայտնում է EurAsia Daily լրատվական կայքը՝ հղում տալով Ռուսաստանի ուղղակի ներդրումների հիմնադրամի տարածած հայտարարությունը։
«Ցավոք, խախտելով գործող պայմանագիրը, Դեղամիջոցների վերահսկման պետական ինստիտուտը սաբոտաժ է արել` պատվաստանյութը դիտմամբ փորձարկման ուղարկելով այնպիսի լաբորատորիա, որը ներառված չէ ԵՄ դեղամիջոցների վերահսկման պաշտոնական լաբորատորիաների ցանցում` չնայած, որ ցանցում ներառվածները հասանելի են եղել», - գրված է Ռուսաստանի ուղղակի ներդրումների հիմնադրամի հաղորդագրության մեջ:
Հիմնադրամը հավելել է նաև, որ տեղեկությունն այն մասին, որ Սլովակիա մատակարարված պատվաստանյութերը տարբերվում են բնօրինակից, կեղծ է։
Միևնույն ժամանակ, շեշտվել է, որ ռուսական պատվաստանյութի բոլոր խմբաքանակները նույն որակի են և որակի խիստ հսկողություն են անցնում «Գամալեյա» կենտրոնում, իսկ պատվաստանյութի որակը հաստատում են աշխարհի 59 երկրներում գործող կարգավորող մարմինները:
Ռուսաստանի ուղղակի ներդրումների հիմնադրամը պահանջել է դեղամիջոցն ուղարկել ԵՄ կողմից հաստատված լաբորատորիա, իսկ ապրիլի 6-ին նամակ է ուղարկել՝ խնդրելով, պայմանագրի բազմաթիվ խախտումների պատճառով, պատվաստանյութը վերադարձնել Ռուսաստան, որպեսզի այն հնարավոր լինի այլ երկրներում։
Լրատվական կայքը հիշեցրել է, որ Սլովակիան եվրոպական առաջին պետություններից էր, որ գնել է ռուսական «Սպուտնիկ V» պատվաստանյութ։ Առաջին խմբաքանակը ժամանել է մարտի 1-ին՝ 200 հազար դեղաչափով, որի գնումը երկրում կառավարական ճգնաժամ է առաջացրել և վարչապետ Իգոր Մատովիչը հրաժարական է տվել։ Ավելի ուշ Սլովակիայի դեղերի ազգային վարչությունը հայտնել էր, որ պատվաստանյութի ներկրված չափաբաժինը տարբերվում է այն դեղամիջոցից, որը նկարագրվում է բժշկական ոլորտում հայտնի The Lancet ամսագրում։