ՀՀ–ում Հնդկաստանի դեսպանությունը կապի մեջ է Երասխում վիրավորված հնդիկների հետ

Հայաստանում Հնդկաստանի դեսպանությունը կապի մեջ է այսօր Երասխում ադրբեջանական կրակոցներից վիրավորում ստացած երկու հնդիկների հետ։ Sputnik Արմենիայի հետ զրույցում տեղեկությունը հայտնեցին դեսպանությունից։

Ավելի վաղ տեղեկացրել էինք, որ Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ արձակված ադրբեջանական կրակոցներիի հետևանքով վիրավորում են ստացել գործարանի կառուցման շինարարական աշխատանքներում ներգրավված Հնդկաստանի քաղաքացիներ Մուհամադ Ասիֆը և Միրհասան Սահաջանը:

«Դեսպանությունը կտրամադրի իր քաղաքացիներին այն ամենը, ինչի կարիքը նրանք կունենան»,– մեզ հետ զրույցում ասացին Հնդկաստանի դեսպանությունում։

Հիշեցնենք` ադրբեջանական ստորաբաժանումները հունիսի 13-ից պարբերաբար կրակում են Երասխի հատվածում տեղակայված հայկական դիրքերի ուղղությամբ։ Այսօր ՊՆ–ն հայտնեց, որ Ադրբեջանի զինված ուժերը ժամը 11:45-ի սահմաններում կրակ են բացել Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ, ինչի հետևանքով վիրավորվել է Հնդկաստանի 2 քաղաքացի։

Արարատի մարզպետ Սեդրակ Թևոնյանն ավելի ուշ հայտնեց, որ հնդիկները բեկորային վնասվածք են ստացել, նրանց կյանքին վտանգ չի սպառնում:

Արարատի ԲԿ վիրաբուժական բաժնի վարիչ Արթուր Ներսիսյանն էլ մեզ հետ զրույցում տեղեկացրեց, որ տղամարդիկ վիրավորում էին ստացել կրծքավանդակի հատվածում, երկուսն էլ վիրահատվել են։