Հույս ունենք, որ դա հնարավոր է․ ԱՄՆ դեսպանն՝ Ադրբեջանի կազմում արցախահայերի գոյատևելու մասին

• 03.07.2023, 23:29
•  Ամերիկա,  Տարածաշրջան,  Աշխարհ,  Հայաստան,  ԼՂՀ

Ամերիկայի Միացյալ Նահանգները հստակորեն հայտարարել է, որ կողմերի միջև վաղուց շարունակվող հակամարտությունը չունի ռազմական լուծում։ Այս մասին Հանրային հեռուստաընկերությանը տված հարցազրույցում ասաց ՀՀ-ում ԱՄՆ դեսպան Քրիստինա Քվինը՝ անդրադառնալով վաշինգտոնյան վերջին բանակցությունների թեմային և այդ ընթացքում ադրբեջանական կրակոցներին, փոխանցում է Tert.am-ը։

«Բայց ի վերջո մենք տեսնում ենք, որ մնայուն, երկարաժամկետ խաղաղությունն է տարածաշրջանում առկա խնդիրները լուծեու ուղին։ Ահա թե ինչու ենք մենք հանձնառու, որ փորձենք նպաստել այն բանակցություներին, որոնք կհանգեցնեն նման խաղաղության»,- նշեց Քրիստինա Քվինը։

Ըստ նրա՝ Հայաստանն ու Ադրբեջանը ներգրավված են բանակցություներին, «եկել են սեղանի շուրջ, և անկեղծ ու բաց քննարկում է եղել կողմերի միջև առկա տարակարծությունների վերաբերյալ»։

«Եվ մենք հավատում ենք․ որ երկու կողմերն էլ կարող են տեսնել, որ ի վերջո կարող է լինել խաղաղություն։ Եվ մեծ հույս ունենք, որ կօգնենք դա ապահովել»,- հավելեց ԱՄՆ դեսպանը։  

Անդրադառնալով Լեռնային Ղարաբաղի բնակչության իրավունքների և անվտանգության հարցին՝ դիվանագետն ասաց, որ ԱՄՆ-ն վաղուց ասել է, որ «ԼՂ-ում ապրողների իրավունքերը և անվտանգությունը պետք է պաշտպանված լինեն»։

«Եվ որ պետք է լինի բանակցություն, և այնպիսի վերջնարդյունք, որը կպաշտպանի ԼՂ-ում ապրողների իրավունքները և անվտանգությունը։ Անձամբ ես վստահաբար այն կարծիքին եմ, որ ԼՂ-ում  մարդիկ պետք է կարողանան իրենց անվտանգ զգալ սեփական տներում, իրենց միջավայրում ու խաղաղ ընտանեկան կյանք վարել ու ներգրավվածություն ուենանալ իրենց համայնքներում։ Ուստի Միացյալ Նահանգները հաստատկամորեն հավատում է, որ լուծման ուղղությամբ շարունակվող քննարկումներում պետք է ապահովված լինեն նշված սկզբունքները»,- պարզաբանեց ԱՄՆ դեսպանը։

Խոսելով արցախահայերի՝ Ադրբեջանի կազմում գոյատևելու հնարավորության մասին՝ Քվինն ասաց․ «Հավատացած ենք ու հույս ունենք, որ դա հնարավոր է։ Եվ կարծում ենք, որ բոլոր կողմերը պետք է միասնաբար ջանքեր գործադրեն, որպեսզի դա հնարավոր դարձնեն։ Միացյալ Նահանգները կարծում է, որ դա է ճիշտ մոտեցումը։ Եվ բոլոր կողմերին քաջալերում  ենք, որ միասնաբար ջանքեր գործադրեն՝ ապահովելու նշված իրավունքները և անվտանգությունը։ Ես նաև պետք է ասեմ, որ բոլոր կողմներն ասել են, որ իրենք համարում են, որ ԼՂ-ում ապրողների իրավունքները և անվտանգությունը պետք է երաշխավորված լինի»։