Չէինք հաշվարկել, որ Թուրքիայի ԶՈւ-ն կարող էր հայտնվել արցախյան թատերաբեմից 25 կմ հեռավորության վրա․ Դավիթ Տոնոյան

• 01.08.2023, 14:30
•  Տարածաշրջան,  Աշխարհ,  Հայաստան,  ԼՂՀ

Sputnik Армения

«Հաստատ հիշում եմ, այդպիսի խոսակցություն եղել է Անվտանգության խորհրդում»,- ԱԺ 44-օրյա պատերազմի հանգամանքները ուսումնասիրող քննիչ հանձնաժողովի այսօրվա նիստում հայտարարեց պաշտպանության նախկին նախարար Դավիթ Տոնոյանն՝  անդրադառնալով հարցին, թե Օնիկ Գասպարյանը պատերազմի երրորդ օրը Անվտանգության խորհրդի նիստում զեկուցել է՝ ՀՀ զինված ուժերը ունակ չեն կանգնեցնել թշնամու ագրեսիան և պնդել է, որ պատերազմն անհրաժեշտ է կանգնեցնել քաղաքական միջոցներով, հայտնում է Panorama-ը:

«Ես հաստատ հիշում եմ, այդպիսի խոսակցություն եղել է Անվտանգության խորհրդում, չգիտեմ, թե որ մասն է հրապարակել ԱԽ-ն,  այդպիսի խոսակցություն եղել է նաև այլ ձևաչափերով, դրա վերաբերյալ առաջին զեկույցը ստացել եմ ես։ Դուր է եկել այդ զեկույցն ինձ, դուր չի եկել, բայց մենք պարտավոր էինք և՛ վարչապետին, և՛ Անվտանգության խորհրդին ներկայացնելու մեր մոտեցումը, քանի որ դրա հիմնական պատճառը նաև երրորդ կողմի անմիջական ներգրավվածությունն էր, որը մեզ համար տեսանելի էր»,- ասաց Տոնոյանը՝ մանրամասնելով, որ երրորդ կողմը Թուրքիան է։

Նրա խոսքով՝  Թուրքիայի անմիջական ներգրավվածությունը ոչ թե Նախիջևանի կամ Հայաստանի Հանրապետության սահմանի ուղղությամբ էր, այլ «ձիու քայլով» Արցախի թատերաբեմում էր։
«Դրա մասին ևս հրապարակային նշել եմ, այդպիսի հաշվարկը մեր կողմից թերի է եղել, մենք չենք հաշվարկել նման բան, որ Թուրքիայի ԶՈւ-ն անմիջապես կարող էր հայտնվել Արցախյան թատերաբեմից 25-45 կմ հեռավորության վրա` իրականացնելով թռիչքներ», - նշեց Դավիթ Տոնոյանը։