Սահմանին լարվածությունը համեմատաբար նվազել է․ Արծրուն Հովհաննիսյան

• 23.03.2015, 12:57
•  Տարածաշրջան,  Հայաստան,  ԼՂՀ

Գիշերը հայ-ադրբեջանական և արցախա-ադրբեջանական սահմանին համեմատաբար հանգիստ է եղել:

«Արմենպրես»-ի հետ զրույցում ՀՀ պաշտպանության նախարարության մամուլի խոսնակ Արծրուն Հովհաննիսյանն ասել է, որ նախորդ շաբաթվա համեմատությամբ կրակոցների թիվը նվազել է, լարվածության աստիճանը` նույնպես:

«Կարելի է ասել, որ լարվածությունը նվազել է, կրակում են, բայց ոչ այն ուժգնությամբ և քանակությամբ, ինչպես նախորդ շաբաթ»,- ասաց Արծրուն Հովհաննիսյանը` հավելելով, որ հակառակորդի «լռությունը» պայմանավորված է հայկական զինված ուժերի պատասխանով և այն գործողություններով, որոնք նրանք կատարում են սահմանին անվտանգությունը պահպանելու համար:

Անդրադառնալով շարքային զինծառայող Անդրանիկ Գրիգորյանի՝ հակառակորդի կողմն անցնելու փաստին, Հովհաննիսյանն ասաց, որ դեպքի մանրամասները քննվում են, իսկ ՊՆ Քննչական ծառայությունն արդեն գործ է հարուցել սահմանը անօրինական կերպով հատելու առնչությամբ:

Հիշեցնենք, որ ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, մարտի 22-ին՝ ժամը 13:50-ի սահմաններում, հակառակորդի կողմն է անցել ՊԲ զինծառայող, 1991թ. ծնված շարքային-պայմանագրային Անդրանիկ Արարատի Գրիգորյանը: