Նոր «ժողովրդավար» քայլ Թուրքիայում

• 06.04.2015, 17:53
•  Տարածաշրջան,  Աշխարհ

Թուրքիան շարունակում է ապացուցել աշխարհին, որ իր երկրում չկա իրական ժողովրդավարություն: Այս անգամ այն սկսել է խիստ քննադատական և  ավելի բարձր մակարդակով ճնշում գործադրել սոցիալական կայքերի վրա՝ արգելափակելով Twitter-ը, Youtube-ը և Facebook-ը: Ինչպես հայտնում է Daily News-ը, այս որոշումը կայացվել է այն բանից հետո, երբ կայքերը հրապարակել են լուսանկարներ, որտեղ անցած շաբաթ Ստամբուլում զինված անձինք թուրք դատախազին պատանդ են վերցրել:

 Բացի այս երեք աշխարհի խոշորագույն կայքերից՝  այս միջադեպի վերաբերյալ կան նաև այլ հղումներ, որոնք հրապարակվել են թուրքական թերթերում: Ինչպես հայտնում է  Hürriyet-ը, իշխանությունները արգելափակել են մոտավորապես 166 կայք, որոնք «իրենց թույլ են տվել» հրապարակել վիճահարույց լուսանկարները: Ապրիլի 1-ին, մոտ 13 լրատվական կազմակերպությունների և լրագրողների, որոնք հրապարակել են լուսանկարներ, որտեղ Կիրազը՝ դատախազը, պատանդի կարգավիճակով է պատկերված, արգելել են մասնակցել մամուլի ասուլիսին և վերջինիս հուղարկավորության արարողությանը:

Ինչպես արդեն հայտնել էինք՝ թուրքական ձախակողմյան խմբավորման անդամները հինգշաբթի օրը պատանդ էին վերցրել դատախազին,  ով հետաքննում էր 2013թ.-ին ցույցերի ժամանակ մահացած 15-ամյա Բերկին Էլվանի գործը:  «Հեղափոխական ժողովրդական ազատագրական կուսակցություն-ճակատ» խմբավորումը  հրապարակել էր լուսանկարներ, որտեղ երևում է, թե ինչպես է զինված անձն ատրճանակը պահել դատախազի գլխին և հայտարարում է, որ կսպանի նրան, եթե իր պահանջները չբավարարվեն: