Հունաստանի վարչապետը հանդուգն առաջարկություն է արել իր պարտատերերին

• 07.07.2015, 23:00
•  Եվրոպա,  Աշխարհ

Հունական հանրաքվեի մասին այսօր ողջ աշխարհն է խոսում: Միջազգային հանրության, համաշխարհային և հատկապես եվրոպական մեդիա դաշտի ուշադրությունը կենտրոնացած է հանրաքվեի արդյունքների, դրան հաջորդող զարգացումների ու հետագա հնարավոր սցենարների վրա:

Եվրոպական Միության բարձրաստիճան պաշտոնյաներն, այդ թվում` Եվրահանձնաժողովի նախագահ Ժան-Կլոդ Յունկերն ու Եվրախորհրդարանի ղեկավար Մարտին Շուլցը նշել են, որ, չնայած հույն ժողովուրդը դեմ է քվեարկել վարկատուների նշած պահանջներին, և չնայած նրանք հարգում են հույների կամքն ու որոշումը, ամեն դեպքում չեն ցանկանում, որ դա հանկարծ հանգեցնի Հունաստանի եվրագոտուց հեռանալուն կամ առավել ևս Եվրոպական Միությունը լքելուն:

«Մենք չպետք է թերագնահատենք հանրաքվեի արդյունքները, սակայն չենք կարող չնշել, որ Հունաստանին մեզնից հեռացնելը բնավ մեր նպատակը չէ», - ասել է Շուլցը, իսկ Յունկերն, իր հերթին ավելացրել է.«Բանակցությունները կշարունակվեն այնքան, որքան պետք է: Մենք պետք է գանք փոխզիջման»:

Նույն կարծիքին են նաև Ֆրանսիայի և Գերմանիայի ղեկավարները: Այնպիսի տպավորություն է ստեղծվում, որ թե՛ Անգելա Մերկելը, թե՛ հատկապես Ֆրանսուա Օլանդը փորձում են ամեն գնով պահել Հունաստանին և ոչ մի դեպքում թույլ չտալ վերջինիս կտրուկ քայլերի դիմել:

Սա, իհարկե, ըստ փորձագետների, պայմանավորված է ոչ թե հույների հանդեպ մեծ սիրով կամ կարեկցանքով, այլ ավելի շուտ այն մտավախությամբ, որ հանրաքվեի հետևանքները շղթայաբար կազդեն մյուս միջերկրածովյան պետությունների` Իտալիայի, Իսպանիայի և Պորտուգալիայի վրա:

ԵՄ առաջնորդները վախենում են նաև Ռուսաստանի հնարավոր ակտիվացումից: Բանն այն է, որ ՌԴ նախագահ Վլադիմիր Պուտինն այժմ ամեն ինչ անում է ծանր դրության մեջ գտնվող Ալեքսիս Ցիպրասին «սիրաշահելու» և հնարավոր ամեն ինչով «օգնելու» համար: Հունաստանի վարչապետը ճիշտ է առայժմ չի հանձնվում և չի «դավաճանում» իր եվրոպական ընտանիքին, բայց ամեն դեպքում ընտանիքի անդամները զգուշանում են ու չեն ուզում շատ կոպիտ խոսել իրենց այդքան գլխացավանք պատճառած և ծանր դրության մեջ գտնվող Հունաստանի հետ:

Հատկանշական է, որ նույն բանը կողքից անընդհատ ԱՄՆ-ն է հուշում` հորդորելով թե՛ ԵՄ-ին, թե' հունական կողմին ընդհանուր հայտարարի գալ և վերջ տալ այս ողջ անհեթեթությանը:

Ցիպրասն էլ, որպես բավական խելացի ղեկավար, շահելով ժողովրդի վստահությունը և այն օգտագործելով վարկատուների դեմ, այժմ էլ նոր նախագիծ է կազմել, որն օրերս կայանալիք եվրագոտու անդամների հերթական գագաթաժողովի ժամանակ պետք է ներկայացնի ԵՄ-ին:

Օգտվելով առիթից, որ բոլորն ամեն կերպ ջանում են հետ պահել Հունաստանին եվրագոտին և ԵՄ-ն լքելուց, Ցիպրասը որոշել է 30%-ով կրճատել տալ Հունաստանի պարտքերը, որպեսզի կարողանա դրանց տակից դուրս գալ:

Սա իհարկե էապես կթեթևացնի երկրի միլիարդավոր եվրոների արտաքին պարտքը, բայց մյուս կողմից էլ, դժվար թե հավանության արժանանա արդեն իսկ պարտքերի մարման ժամկետներն այդքան հետաձգած և Հունաստանին պարբերաբար ընդառաջ գնացած պարտատերերի կողմից: