Քրդերն ու իրաքցի զինվորականները լայնամասշտաբ գործողություն են սկսել Մոսուլի մոտ

• 17.10.2016, 10:54
•  Մերձավոր Արևելք,  Աշխարհ

Reuters

Քրդական զորամիավորումները (փեշմերգա) ու իրաքյան զորքերը լայնամասշտաբ գործողություն են սկսել Մոսուլ քաղաքի մոտ՝ նպատակ ունենալով մաքրել իրաքյան Նայնավա նահանգն ու դրա վարչական կենտրոն համարվող Մոսուլն «Իսլամական պետություն» ահաբեկչական խմբավորման անդամներից: Այս մասին, ինչպես փոխանցում է РИА Новости-ն, Twitter-ում հայտնել է քրդական հրամանատարությունը:

«Մոտավորապես ժամը 06:00-ին Մոսուլից դեպի արևելք ընկած Խազերում տեղակայված քրդական ուժերն ու  Մոսուլից դեպի հարավ ընկած Գվերում և Գայարայում գտնվող անվտանգության իրաքյան ուժերը սկսել են համակարգված լայնամասշտաբ գործողություն, որն ԻՊ-ի ահաբեկիչներից Նայնավան ազատագրելուն ուղղված առաջին քայլն է»,-նշվում է թվիթերյան հաղորդագրությունում:

Նշվում է, որ Խազերում կենտրոնացված է մոտ 4.000 քուրդ զինյալ, որոնք Իրաքի դաշնային կառավարության հետ կնքած համաձայնագրի շրջանակում պետք է 3 ռազմաճակատում ազատագրեն իսլամիստների գրաված գյուղերը:

Միևնույն ժամանակ միջազգային կոալիցիայի ռազմական օդուժը հոկտեմբերի 16-ից ռմբակոծում է ԻՊ-ի դիրքերն ու աջակցում Մոսուլի ազատագրման գործողությանը:

Իրաքի՝ մեծությամբ երկրորդ քաղաք Մոսուլը 2014 թվականից մնում է ԻՊ-ի գլխավոր պատվարը։ Տարբեր տվյալներով քաղաքում կա 3,5-4 հազար գրոհային: