Թուրք հաքերները կոտրել են Սևան Նիշանյանի թվիթերյան էջը

• 28.07.2017, 11:05
•  Տարածաշրջան,  Հայաստան,  Սփյուռք

Agos

Թուրքական հաքերային «Ayyıldız Tim» խմբավորումը կոտրել է պոլսահայ մտավորական, լեզվաբան Սևան Նիշանյանի թիվիթերյան էջը: Ինչպես հաղորդում է «Արմենպրես»-ը, հաքերները տեղադրել են տեսանյութ, կատարել են գրառում, ինչպես նաև թողել են իրենց լուսանկարը:

«Մի հիմար թռչուն արտասահման է փախել և դրանով պարծենում է: Նման պարագայում այդ թռչունին բռնելու գործը մեզ է մնացել: «Ayyıldız Tim»-ը ողջունում է», - գրել են հաքերները Նիշանյանի թվիթերյան էջում:

Պոլսահայ մտավորականը ֆեյսբուքյան իր էջում ևս գրառում է կատարել՝ հայտնելով, որ թվիթերյան էջը կոտրել են: «Կարծում եմ՝ թվիթերյան էջումս վիրուս կա, այն իմ վերահսկողության տակ չէ»,- գրել է նա:

Հիշեցնենք, որ Սևան Նիշանյանը թուրքական դատարանների կողմից 11 տարվա ազատազրկման էր դատապարտվել իր այգում «ապօրինի» շինարարության համար։ Այս տարվա հուլիսի 14-ին նա դուրս էր եկել բանտից ու այլևս չէր վերադարձել: Ավելի ուշ հայտնի դարձավ, որ նա հեռացել է Թուրքիայի տարածքից:

Նշենք, որ Նիշանյանը միշտ բացահայտ խոսել է Հայոց ցեղասպանության մասին ու աչքի ընկել իր դիրքորոշումով։