Ղազախստանը 2,5 մլրդ դոլարի համաձայնագրեր է ստորագրել ԱՄՆ-ի հետ

• 17.01.2018, 12:30
•  ԵԱՏՄ,  Ամերիկա

Звезда

Նուրսուլթան Նազարբաևի Վաշինգտոն այցի շրջանակում Ղազախստանը ընդհանուր 2,5 մլրդ դոլարի ամերիկյան արտադրանք և ծառայություններ է գնել: Այս մասին երեքշաբթի հայտնել է  Պետքարտուղարության մամուլի ծառայությունը, փոխանցում է NEWS.am-ը:

«Այցի ընթացքում ստորագրվել են մեծ թվով պայմանագրեր և փաստաթղթեր, այդ թվում՝ Boeing Company-ի, GE Transportation-ի, GE Digital-ի, Chevron-ի, Air Astana-ի, KazTemirZholy-ի, SCAT Airlines-ի և ազգային բարեկեցության «Սամրուկ-Կազինա» հիմնադրամի միջև նոր համաձայնագրեր 2,5 մլրդ դոլարից ավելի ամերիկյան արտադրանք և ծառայություններ ձեռք բերելու մասին»,- նշված է հաղորդագրության մեջ:

Նշվում է նաև, որ ԱՄՆ-ն ու Ղազախստանը շարունակում են համագործակցել Առևտրի համաշխարհային կազմակերպության շրջանակում: 2016 թվականին երկկողմանի առևտրի ծավալը հասել է 1,9 մլրդ դոլարի, Վաշինգթոնն ու Աստանան մտադիր են այս ոլորտում հարաբերությունները զարգացնել:

Նուրսուլթան Նազարբաևի մամուլի ծառայությունն իր հերթին հայտնել է, որ Ղազախստանի նախագահի այցի ընթացքում ստորագրվել է ավելի քան 20 համաձայնագիր ներդրումային և առևտրատնտեսական համագործակցության մասին:

Մամուլի ծառայությունը տեղեկացրել է, որ այցի շրջանակում կնքվել է 3 միջկառավարական համաձայնագիր՝ պետական օդանավերի աերոնավիգացիոն սպասարկման դիմաց չվճարելու մասին, Ղազախստանի տարածքով երկաթուղային կոմերցիոն տարանցման ապահովման մասին համաձայնագրի արձանագրություն, միջազգային հարկային կարգապահության կատարելագործման մասին համաձայնագիր: