Ադրբեջանցի ակտիվիստներն ԱՄՆ-ում պահանջում են Ալիևի հրաժարականը

• 15.03.2018, 13:46
•  Ամերիկա,  Տարածաշրջան,  Աշխարհ

Azadliq.info

Ադրբեջանցի ակտիվիստները մարտի 14-ին Վաշինգտոնում ադրբեջանական դեսպանատան դիմաց Իլհամ Ալիևի բռնապետական ռեժիմի դեմ ուղղված բողոքի ակցիա են իրականացրել, փոխանցում է «Արմենպրես»-ը:

Ակտիվիստներն ակցիային մասնակցել են դիմակներով և պաստառներով, որոնց վրա գրված են եղել «Դիմադրիր Ալիևին», «Ազատություն ադրբեջանցի ժողովրդին», «Բռնապետը նույնն է, դարն է ուրիշ», «Պաշտպանեք մարդու իրավունքները» կոչերը:

«Սա մեր առաջին քայլն է, սակայն այս ամենը շարունակվելու է: Մեր նպատակն է մեր ձայնը Ադրբեջանին լսելի դարձնել»,-խոսելով ակցիայի նպատակների մասին՝ նշել է ադրբեջանցի ակտիվիստներից մեկը:

Ակցիայի մասնակիցներն անդրադարձել են նաև ներկայումս Ադրբեջանում ձերբակալված հարյուրավոր քաղբանտարկյալներին և երկրի ղեկավարությունից պահանջել անհապաղ ազատ արձակել նրանց:

Ակցիայի ժամանակ ադրբեջանցի վտարանդի ակտիվիստները քննադատել են Ադրբեջանում իրենց ընտանիքների անդամների նկատմամբ իրականացվող ճնշումները և պահանջել Իլհամ Ալիևի կառավարության հրաժարականը:

«Իլգար Մամեդովից, Աֆղան Մուխտարլիից, Գիյաս Մամեդովից և Գյոզալ Բայրամլիից բացի, Ադրբեջանում կան 200-ից ավելի քաղբանտարկյալներ: Որպես արտասահմանում բնակվող և մեր երկիրը սիրող մարդիկ՝ մենք նույնպես հայտնում ենք մեր դժգոհությունն ու պահանջում ազատ արձակել բոլոր քաղբանտարկյալներին»,-նշել են ակտիվիստները:

Դիմակների միջոցով ակտիվիստները փորձել են թաքցնել իրենց դեմքը, որպեսզի Ադրբեջանում իշխանությունները ճնշումների չենթարկեն իրենց հարազատներին: