Իտալիայի ՆԳ նախկին նախարարը կկանգնի դատարանի առաջ՝ միգրանտների գործով

• 18.04.2021, 11:49
•  Եվրոպա,  Աշխարհ

Իտալիայի ՆԳ նախկին նախարար և փոխվարչապետ, «Լիգա» կուսակցության առաջնորդ Մատեո Սալվինին կկանգնի դատարանի առջև մի գործով, որում նա մեղադրվում է միգրանտներին ապօրինի պահելու և պաշտոնեական լիազորությունները չարաշահելու մեջ:  Պալերմոյում առաջին նիստը նշանակված է սեպտեմբերի 15-ին:

Լինելով ՆԳՆ ղեկավար և վարելով անօրինական միգրացիայի դեմ պայքարի քաղաքականություն՝ Սալվինին արգելել է մուտքը իտալական նավահանգիստներ և թույլ չի տվել, որ իսպանական Open Arms հասարակական կազմակերպության նավից 147 միգրանտներն իջնեն: Սալվինին պնդում է, որ գործել է պետության շահերից ելնելով՝ ամբողջ կառավարության համաձայնությամբ: Սակայն «5 աստղ շարժում» իշխող կոալիցիայում «Լիգա»-ի նախկին դաշնակիցները, ինչպես նաև նախկին վարչապետ Ջուզեպպե Կոնտեն հերքում են, որ իրենք կողմ են արտահայտվել ծովում գտնվող փրկված միգրանտներով նավերի արգելափակմանը:

Մեղքը ընդունելու դեպքում «Լիգա»-ի առաջնորդին սպառնում է երեք տարվա ազատազրկում: Եթե դատավճիռը հաստատվի բոլոր դատական ատյաններում, ըստ օրենքի, Սալվինին չի կարողանա մասնակցել ընտրությունների և զբաղեցնել պետական պաշտոններ: