Հայ Առաքելական Սուրբ Եկեղեցու Արցախի թեմը, հանուն Արցախ աշխարհի խաղաղության, հրավիրում է բոլորին միասնական աղոթքի

• 31.03.2022, 16:24
•  Աշխարհ,  ԼՂՀ

Հայ Առաքելական Սուրբ Եկեղեցու Արցախի Թեմը միասնական աղոթքի կոչ է արել։

«Հայ Առաքելական Սուրբ Եկեղեցու Արցախի թեմը, մեր երկրի անվտանգությամբ մտահոգ, դիմում է արցախցիներին՝ ապաշխարության կոչով:

Այս իրավիճակից միայն Աստված կարող է մեզ դուրս բերել. ♰ «Դարձեք դեպի Ինձ, և Ես կդառնամ դեպի Ձեզ» ♰ - ասում է Աստված:

Այս նպատակով ապրիլի 2-ին ժամը 17:00-ին Արցախի թեմը, հանուն Արցախ աշխարհի խաղաղության, հրավիրում է բոլորին միասնական աղոթքի` Ստեփանակերտի Սուրբ Աստվածածին Մայր Տաճարում և մյուս համայնքների բոլոր գործող եկեղեցիներում:

Բոլորի աղոթական ներկայությունը ցանկալի է. ֆիզիկապես մասնակցել չկարողանալու պարագային խնդրում ենք միանալ ընդհանրական աղոթքին մտքով և հոգով։

Արցախի թեմը կոչ է անում մեր ժողովրդին զինվել ամուր հավատով և համբերությամբ` այս դժվարությունների պահին անդրադառնալով մեր ապրած կյանքին ու Աստծո հետ ունեցած մեր հարաբերություններին։ Մշտապես ուշադրություն դարձնելով հոգևոր իրականությանը՝ մասնակցել եկեղեցածիսական արարողություններին և զարկ տալ սեփական հոգևոր զարթոնքին:

Մեր կարգախոսն է.

♰ «Այն, ինչը հնարավոր չէ մարդկանց համար, հնարավոր է Աստծու համար»: ♰

Աստված թո՛ղ պահի ու պահպանի Հայաստան և Արցախ աշխարհը…»,-նշված է կոչում։