Ադրբեջանցի ընդդիմադիր լրագրողների վրա հարձակումները չեն թուլանա նաև 2022 թվականին. Greek City Times

• 12.08.2022, 15:03
•  Տարածաշրջան,  Աշխարհ

Հունական « Greek City Times» պարբերականը ծավալուն հոդված է հրապարակել Ադրբեջանում անկախ լրագրողների հանդեպ բռնաճնշումների առնչությամբ:

Ինչպես տեղեկացնում է Արմենպրես-ը, հոդվածագիրը նախ անդրադարձել է Հունաստանի վարչապետ Կիրիակոս Միցոտակիսի հայտարարությանը, որով վերջինս IGB-ը ( Interconnector Greece-Bulgaria- Հունաստան-Բուլղարիա գազամուղ- խմբ) բնութագրել էր որպես «արժեքների խողովակաշար», որը կապում է Հունաստանի բնական գազի փոխադրման ազգային համակարգը Բուլղարիայի ցանցի հետ եւ կարող է տարեկան միլիարդավոր խորանարդ մետր գազ տեղափոխել Ադրբեջանից: Խոսելով Ադրբեջանի կողմից Լեռնային Ղարաբաղի հայերի նկատմամբ շարունակվող էթնիկ զտումների քաղաքականության մասին՝ հոդվածագիրը հարցադրում է արել, թե որքանով են տեղին Հունաստանի ղեկավարության նման հայտարարությունները:

«Եթե որպես օրինակ նայենք նաև մեդիա ոլորտին, ապա այն արժեքները, որոնց մասին խոսում է Միցոտակիսը, բավարար չեն։ «Լրագրողներ առանց սահմանների» կազմակերպության հաշվետվության մեջ ասվում է. «Նախագահ Իլհամ Ալիևը վերացրել է բազմակարծության ցանկացած երևույթ, և 2014 թվականից ի վեր նա անխղճորեն փորձում է լռեցնել մնացած բոլոր քննադատներին»: Ոչ մի անկախ հեռուստատեսություն կամ ռադիո չի հեռարձակվում երկրի ներսում, եւ քննադատական դիրքորոշմամբ բոլոր տպագիր թերթերը փակվեցին: Պետական գրաքննության թիրախում գտնվող անկախ լրատվական կայքերի մեծ մասը, ինչպիսին է Azadliq amd Meydan TV-ն, գործում են արտասահմանում»,- ասված է հոդվածում:

« Greek City Times»-ի հոդվածագիրը դրանով է նաեւ բացատրում, որ վերջին 20 տարվա ընթացքում ոչ մի պաշտոնյա կամ ոստիկանության աշխատակից չի պատժվել լրագրողին ծեծելու կամ վիրավորելու համար, և որ «Բաքվի ռեժիմը փորձում է արտաքսման մեջ գտնվող անկախ լրագրողներին լռեցնել՝ ճնշում գործադրելով երկրում մնացած նրանց ընկերների ու հարազատների վրա:

«Սակայն առավել մտահոգիչ է այն, որ Ալիևի վարչակարգը լրագրողների վրա իր հարձակումներն արտահանում է Ադրբեջանի սահմաններից դուրս»- նկատում է հոդվածագիրը:

«Greek City Times»-ի լրագրողը ներկայացրել է 2022 թվականին տեղի ունեցած հարձակումները լրագրողների վրա և  նրանց սպանությունները Ադրբեջանի սահմաններից դուրս.

Մայիսի 31 -ին ադրբեջանցի բլոգեր Թուրալ Սադօղլին, ով ապրում է Գերմանիայում, սակայն ներկայումս գտնվում է Մեծ Բրիտանիայում, հայտարարել է, որ Ադրբեջանի իշխանությունները իր դեմ դավադրություն են նախապատրաստում:

«Ես ձեզ վստահեցնում եմ, որ իմ կյանքը լուրջ վտանգի տակ է։ Այս անգամ նրանք ինչ-որ բան են ծրագրում իմ դեմ։ Համապատասխան հանձնարարական է տվել նախագահի աշխատակազմը: Այդ իսկ պատճառով ծնողներս վաղը բողոքի ակցիա կանցկացնեն Բաքվում՝ նախագահականի դիմաց։ Ես խնդրում եմ քաղաքական կուսակցություններին, իրավապաշտպաններին, ակտիվիստներին, լրագրողներին աջակցել նրանց», – գրել է Սադօղլին «Ֆեյսբուք»-ի իր էջում։

Ավելի ուշ  Գերմանիայում բնակվող ադրբեջանցի լրագրող, նախկին քաղբանտարկյալ Աֆղան Մուխթարլին իր սոցիալական ցանցերում հաստատել է բլոգերի կյանքին սպառնացող վտանգը:

«Գերմանիայում բնակվող ադրբեջանցի ներգաղթյալ և բլոգեր, «Azad soz» (Խոսքի ազատություն) կազմակերպության ղեկավար Թուրալ Սադօղլին գրել է իր կյանքին սպառնացող լուրջ վտանգի մասին։ Ալիևի ռեժիմը բազմիցս ձերբակալել, առեւանգել եւ շանտաժի է ենթարկել արտասահմանում բնակվող իր հակառակորդներին։ Իլհամ Ալիևը բազմիցս ահաբեկչական խմբավորումներ է օգտագործել նրանց դեմ, ում նա չէր կարողացել ձերբակալել։ Անցած տարի Բայրամ Մամեդովը սպանվել էր Ստամբուլում, Վուգար Ռզան՝ Բելգիայում, Հուսեյն Բակիխանովը՝ Թբիլիսիում: Փորձեր են արվել սպանել Մագոմեդ Միրզալիին, Օրհան Աղաևին, Օրդուխան Բաբիրովին, Գաբիլ Մամեդովին։ Ֆրանսիայի ոստիկանությունը ձերբակալել է մի քանի մարդու՝ Մագոմեդ Միրզալիի սպանության փորձի համար։ Թուրալ Սադօղլիի նկատմամբ սպանության սպառնալիքը, նրա բնակության հասցեն փնտրելը բավական լուրջ խնդիր է։ Եվրոպական իրավապահ մարմինները պետք է ապահովեն Թուրալի անվտանգությունը», - ասել է Մուխթարլին։

Հոդվածագիրը մեջբերում է նաև «Infoteka24»-ի հրապարակումը Եվրոպայում ևս մեկ ադրբեջանցի ընդդիմադիր բլոգերի վրա հարձակման մասին։ Այս անգամ հարձակման զոհ է դարձել բլոգեր Մանաֆ Ջալիլզադեն, ով հայտնի է Իլհամ Ալիևի և Մեհրիբան Ալիևայի հասցեին քննադատություններով:

Մանաֆ Ջալիլզադեի հարձակման ենթարկվելու փաստին անդրադարձել է նաև Ֆրանսիայում բնակվող ադրբեջանցի ընդդիմադիր բլոգեր Միրզալի Մուհամադը։

«Շվեյցարիայում բնակվող բլոգեր Մանաֆ Ջալիլզադեին 2022 թվականի ապրիլի 29-ին իր տան դիմաց երեք ադրբեջանցիներ դաժան ծեծի են ենթարկել: Նրա վիճակը շատ ծանր է», -  գրել էր նա «Թվիթեր»-ի իր էջում։

«Greek City Times»-ի լրագրողի խոսքով՝ սրանք ընդամենը 2022 թվականի մի քանի օրինակներ են, սակայն նման դեպքեր կարելի է վեր հանել Ադրբեջանի հետխորհրդային շրջանի յուրաքանչյուր տարում։