Պետք է թույլ չտանք, որ Ադրբեջանը շարունակի արցախահայությանը բնաջնջելու իր սարսափելի քաղաքականությունը. Ռոզա Լինը դիմել է միջազգային հանրությանը

• 16.01.2023, 15:33
•  Աշխարհ,  Հայաստան,  ԼՂՀ

NEWS.am

Ռոզա Լինը սոցիալական ցանցերի իր էջերում անդրադարձել է ALT 98.7 FM-ի համերգին իր հագուստի վրայի՝ Stop The Bockade գրառմանը՝ միջազգային լսարանին բացատրելով դրա նշանակությունը.

«Եթե ձեզ հետաքրքրել է՝ ինչ էր գրված իմ վերարկուին...Նախորդ օրը ես պատիվ ունեցա ելույթ ունենալու ALTer Ego for ALT 98.7 FM համերգին Muse-ի, Red Hot Chilli Peppers-ի, Ջեք Ուայթի, Fall Out Boy և շատ այլ հայտնի խմբերի ու արտիստների հետ: Այդ ամենը երազի էր նման:  Թե շոուի ընթացքում, թե այս գրառումն անելիս ես մտածում եմ Արցախում ապրող մարդկանց մասին, որոնք կտրված են ամբողջ աշխարհից: Դեկտեմբերի 12-ին Ադրբեջանի քաղաքացիները, որոնք պնդում են, թե «էկոակտիվիստներ» են, փակել են Լաչինի միջանցքը, որը Արցախը Հայաստանին ու աշխարհին կապող միակ ճանապարհն է: Սա Ադրբեջանի կողմից հայերին հարված հասցնելու ևս մեկ փորձ է: Արցախցիները դժվար կացության մեջ են, քանի որ այդ միջանցքն  ամեն օր օգտագործվում էր Հայաստանից Արցախ մոտ 400 տոննա սնունդ և դեղորայք փոխանցելու համար: Այս ամենի պատճառով Արցախում կենսական անհրաճշտության պարագաների պակաս կա, 120 հազար հայ, որոնք չեն կարողանում անցնել սահմանը, կտրված են իրենց ընտանիքներից: Նրանք ամբողջովին մեկուսացված են և անպաշտպան»,-գրել է երգչուհին: Նա նաև դիմել է միջազգային հանրությանը՝ խնդրելով կանգնել իր և Հայաստանի կողքին.

«Մենք պետք է վերջ տանք այս շրջափակմանը և թույլ չտանք, որ Ադրբեջանը շարունակի արցախահայությանը բնաջնջելու իր սարսափելի քաղաքականությունը: Դա կարող եք անել՝ բացելով այս հղումը և նշելով Կամիլա Հարիսին՝ խնդրելով նրան խախտել լռությունն այս հարցի շուրջ, թույլ չտալ, որ ԱՄՆ-ն զենք մատակարարի Ադրբեջանին, այլ մարդասիրական օգնություն ցուցաբերի Արցախին»: