Առանց Միջազգային դատարանի անհապաղ գործողությունների Ղարաբաղի հայերի կյանքը վտանգված է. Լոուրենս Մարտին

• 30.01.2023, 15:15
•  Եվրոպա,  Աշխարհ,  ԼՂՀ

Առանց Միջազգային դատարանի անհապաղ գործողությունների Ղարաբաղի հայերի կյանքը վտանգված է։ NEWS.am-ի փոխանցմամբ այս մասին հունվարի 30-ին նիստի ժամանակ հայտարարեց Հայաստանի հայցը ներկայացնող փաստաբաններից Լոուրենս Մարտինը։
«Լեռնային Ղարաբաղի հայերի էթնիկ բնակչությունը գրեթե ամբողջությամբ կտրված է արտաքին աշխարհից եւ զրկված է սննդի, դեղորայքի եւ կենսական անհրաժեշտության այլ իրերի հասանելիությունից:
Առանց դատարանի անհապաղ գործողությունների՝ նրանց կյանքին վտանգ է սպառնում։
2020 թվականի 44-օրյա պատերազմի ընթացքում Ադրբեջանի կողմից գրավված տարածքներից բռնի տեղահանվել են տասնյակ հազարավոր հայեր, ոչ ոք չի կարողացել վերադառնալ իր տուն»,- նշում է Լոուրենսը։
Նրա խոսքով, սակայն, Ադրբեջանն «անում է հնարավոր ամեն ինչ տարածաշրջանում մնացած էթնիկ հայերի կյանքն անտանելի դարձնելու համար»։
«Նրանք հարձակվել են հայկական գյուղերի վրա՝ խախտելով հրադադարի պայմանագիրը։ Նրանք բռնի կերպով տեղահանել են բնակիչներին (գրավյալ տարածքներից-խմբ.), բազմիցս արգելափակել են գազի, բջջային կապի եւ ինտերնետի հասանելիությունը»,- հավելեց նա։
Ղարաբաղում մնացել է մոտ 120 հազար էթնիկ հայ։
«Հայաստանի եւ արտաքին աշխարհի հետ նրանք կապված են միակ միջանցքով՝ Լաչինի միջանցքով, որն այժմ փակ է»,- պարզաբանեց փաստաբանը՝ հավելելով, որ այդ ուղղությամբ թռիչքներ նույնպես չեն իրականացվում, քանի որ «Ադրբեջանը սպառնում է խոցել ցանկացած ինքնաթիռ»։