Երկրաշարժի հետևանքով Սիրիայում ՀՀ մարդասիրական առաքելության ներկայացուցիչները չեն տուժել

Սիրիայում ավերիչ երկրաշարժի հետևանքով երկրում Հայաստանի մարդասիրական առաքելության ներկայացուցիչները չեն տուժել, Sputnik Արմենիային հայտնեց Մարդասիրական ականազերծման կենտրոնի մամուլի քարտուղար Կարինե Հախնազարյանը։

Հայաստանը Սիրիայում մարդասիրական առաքելությանը մասնակցում է 2019 թվականի փետրվարից։

Հալեպում աշխատում են հայ սակրավորները, որոնք մաքրում են տարածքը ականներից, և բժիշկները, որոնք բուժօգնություն են ցուցաբերում բնակչությանը։

Հիշեցնենք, որ առավոտյան ժամը 05.17–ին Թուրքիայի Ղահրամանմարաշ գավառում երկրաշարժ է տեղի ունեցել, որն ավերածությունների է հանգեցրել մի շարք քաղաքներում։ Թուրքական իշխանությունները հայտնել են 912 զոհի ու 5385 վիրավորի մասին։ Բացի այդ, Սիրիայի մի քանի շրջաններում նույնպես ավերածություններ են եղել, որոնք ավելի քան 300 մարդու կյանք են խլել, տուժել են 639-ը։ Ցնցումները զգացվել են նաև Լիբանանի մայրաքաղաք Բեյրութում։

Երկրաշարժի հետևանքով Սիրիայի Հալեպ քաղաքում 4 հայ է զոհվել` մայր ու որդի, ևս 2 հայ էլ` ամուսիններ, մահացել են Թուրքիայի Մալաթիա քաղաքում։

Հավելենք, որ այսօր` Երևանի ժամանակով 14։24-ին և 14։36-ին, Թուրքիայում ևս 2 ուժգին երկրաշարժ է գրանցվել։