Արցախի համար նախատեսված բեռներում մանկական սնունդ կա և արևային կայաններ. Փարիզի քաղաքապետ

 Ֆրանսիան Արցախի Հանրապետության համար ոչ միայն սննդամթերք, այլև մի շարք առաջին անհրաժեշտության իրեր է ուղարկել։ Այս մասին Սյունիքի մարզի Գորիս քաղաքում Արցախի նախագահ Արայիկ Հարությունյանի հետ տեսակապով համատեղ ասուլիսի ժամանակ ասաց Փարիզի քաղաքապետ Անն Իդալգոն:

«Օգնությունը նախատեսված է Արցախի 6 քաղաքի համար։ Բեռներում բացի սննդամթերքից կան նաև մանկական կաթնախառնուրդներ, գեներատորներ և արևային կայաններ։ Լեռնային Ղարաբաղի բնակիչները շրջափակման մեջ են՝ ի հեճուկս միջազգային իրավունքի և 2020 թվականի նոյեմբերի 9-ի հայտարարության»,– նշեց Իդալգոն:

Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։

Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։ Եվս մեկ կցորդիչով բեռնատար ուղարկել էին ֆրանսիական տեղական ինքնակառավարման մարմնները։ Այնուհետև քաղցրավենիքով լի մեկ բեռնատար էլ ուղարկել էր «Գրանդ Քենդի» ընկերությունը։