ԼՂ բուժհաստատություններից տարբեր աստիճանի այրվածքներով 58 քաղաքացի է տարհանվել. ՌԴ ՊՆ

• 27.09.2023, 09:37
•  Աշխարհ,  Հայաստան,  ԼՂՀ

Ստեփանակերտի մոտ վառելիքի պահեստի պայթյունից հետո Ռուսաստանի օդատիեզերական ուժերի սանիտարական ավիացիայի թռիչքներով Լեռնային Ղարաբաղի բուժհաստատություններից տարբեր աստիճանի այրվածքներով 58 քաղաքացի է տարհանվել մասնագիտացված ԲԿ–ներում մասնագիտացված բուժօգնության համար: Այս մասին հայտնում է ՌԴ ՊՆ մամուլի ծառայությունը։

«Ներկա պահին բժշկական ջոկատից տարհանվել է 16 քաղաքացի, հոսպիտալից և Հանրապետական բժշկական կենտրոնից՝ համապատասխանաբար 7 և 35 տուժած», - հայտնել է ռուսական խաղաղապահ զորակազմի բժշկական ջոկատի ղեկավար Պավել Սուսլովը:

Նշվում է, որ ռուսական խաղաղապահ զորակազմի տեղակայման վայրում շարունակում է մնալ 522 խաղաղ բնակիչ, այդ թվում ՝ 293 երեխա, որոնք ներկայում հնարավորություն չունեն վերադառնալ իրենց տները: Կազմակերպվել է նրանց տեղավորումը, սնունդը և բժշկական օգնության տրամադրումը:

Հիշեցնենք` սեպտեմբերի 25-ին Ստեփանակերտ-Ասկերան ավտոճանապարհի հարակից տարածքում` բենզինի պահեստում, տեղի է ունեցել ուժեղ պայթյուն, որի հետևանքով բազմաթիվ մարդիկ են մահացել։

Հաստատված մահերի թիվը 68 է: 21-ի ինքնությունը պարզ է, մյուսներինը՝ ոչ: Վիրավորում ստացած քաղաքացիների թիվը 290 է, որոնցից 168-ը սեպտեմբերի 26–ին տեղափոխվել են ՀՀ բժշկական հաստատություններ։