Եվրոպական խաղերը՝ որպես Ալիևի ընտանիքի գովազդ

• 09.06.2015, 19:22
•  Եվրոպա,  Տարածաշրջան,  Աշխարհ,  Հայաստան

Բաքվում Եվրոպական խաղերի անցկացումը վիրավորանք է օլիմպիական գաղափարին: Այս մասին գերմանական Deutsche Welle-ի հետ զրույցում նշել է ադրբեջանցի բլոգեր,  Meydan TV ինտերնետ պորտալի տնօրեն Էմմին Միլին:

Բլոգերը Ալիևին մեղադրել է սպորտը կոռումպացնելու մեջ։ «Տարբեր տվյաներով նախագահ Ալիևը 3-9 մլրդ ԱՄՆ դոլար է վճարել, որպեսզի Եվրոպական խաղերն անցնեն Բաքվում՝ այն դեպքում, երբ ներդրումների կարիք ունեն այնպիսի ոլորտներ, ինչպիսիք են առողջապահությունը և կրթությունը»,- ասել է Միլին:  Էմմին Միլին նշել է, որ այս խաղերն ամբողջությամբ ծառայում են Ալիևի և նրա ընտանիքի գովազդին:

Նշենք, որ իսկզբանե Եվոպական խաղերը Բաքվում անցկացնելով Ալիևը մտադիր էր նաև գովազդել Ադրբեջանը, սակայն իրականում դա վերածվեց Ադրբեջանի համար հակագովազդի: Եվրոպական խաղերի կապակցությամբ հայտնվելով միջազգային հանրության և իրավապաշտպան կազմակերպությունների ուշադրության կենտրոնում՝ Ադրբեջանը  տապալեց Եվրոպային որպես ժողովրդավարական երկիր ներկայանալու իր փորձը:

Այնպիսի իրավապաշտպան կազմակերպություններ, ինչպիսիք են Amnesty İnternational-ը, Freedom House-ը, Humaт Right Watch-ը և այլն, իրենց զեկույցներում պարբերաբար մտահոգություն են հայտնում Ադրբեջանում քաղաքացիական հասարակության դեմ գործադրվող բռնությունների կապակցությամբ:

Ադրբեջանում մարդու իրավունքների վատ վիճակի վերաբերյալ հունիսի 10-ին Եվրոպական խորհրդարանում տեղի կունենան լսումներ «Սպորտը և մարդու իրավունքները Բաքվում անցկացվելիք Եվրոպական խաղերի համատեքստում» խորագրով: Իսկ մինչ այդ՝ նախօրեին Եվրախորհրդանարի նիստի ժամանակ մի խումբ պատգամավորներ Եվրոպական խորհրդարանի փոխնախագահ, «Կանաչների» խմբակցության ներկայացուցիչ Ուլրիկե Լունաչեկի նախաձեռնությամբ ներկայացել են Լեյլա Յունուսի, Խադիջա Իսմայլովայի, Անար Մամեդլիի, Ռասուկ Ջաֆարովի, Ինթիգամ Ալիևի և Էմին Հուսեյնովի լուսանկարներով շապիկներով:

Նշենք, որ Եվրոպական խաղերը Բաքվից լուսաբանող օտարերկրացի լրագրողներին Բրյուսելում կոչ է արվելու ուշադրություն հրավիրել Ադրբեջանում մարդու իրավունքների խնդրի վրա, ինչպես նաև մասնակիցները ԵԽ-ի և ԵՄ-ի ներկայացուցիչների ուշադրությունը ևս մեկ անգամ փորձելու են կենտրոնացնել Ադրբեջանում տեղի ունեցող իրադարձությունների վրա:

Այս ֆոնին Բաքվում տոնական տրամադրությամբ պատրաստվում են հունիսի 12-ին մեկնարկող Եվրոպական խաղերին: Ադրբեջանական լրատվամիջոցները նշում են, որ խաղերին մասնակցելու են 20 երկրների առաջնորդներ՝ առանց մանրամասնելու, թե խոսքն ում մասին է: Հայտնի է, որ խաղերի բացման արարողությանը կմասնակցեն Ռուսաստանի նախագահ Վլադիմիր Պուտինը, Թուրքիայի նախագահ Ռաջիփ  էրդողանը, Մոնակոյի արքայազնը: Ալիևի՝ խաղերի բացմանը մասնակցելու հրավերը արդեն մերժել են Գերմանիայի կանցլերը և Հունաստանի նախագահը:

 Ավելացնենք, որ առաջին Եվրոպական խաղերին մասնակցում են 50 երկրներից ժամանած մոտ վեց հազար մարզիկներ, ովքեր իրենց ուժերը փորձելու են 20 սպորտաձևերում: Հայկական պատվիրակությունը ևս մասնակցելու է այս խաղերին: Պատվիրակության մեջ ընդգրկված է 23 մարզիկ: Ի տարբերություն մյուս պատվիրակությունների, որոնց ծախսերը վճարում է Բաքում՝ հայկական պատվիրակության ծախսերը վճարելու է հայկական կողմը: