Ուկրաինան նոր հեղափոխության նախաշեմի՞ն

• 22.07.2015, 18:47
•  Եվրոպա,  Աշխարհ

«Աջ սեկտորի» առաջնորդ Դմիտրի Յարոշը հայտարարել է, որ կազմակերպությունն Ուկրաինայում սկսում է հեղափոխության նոր փուլ: Նման հայտարարությամբ նա հանդես է նախօրեին՝ հուլիսի 21-ին, Մայդանում կայացած «Կորչի դավաճանների իշխանությունը» կարգախոսով ցույցի ժամանակ, որին մասնակցում էր մի քանի հազար մարդ:

Իր ելույթի ժամանակ Դմիտրի Յարոշը նշել է, որ «Աջ սեկտորը» պատրաստվում է իշխանություններին անվստահություն հայտնելու վերաբերյալ հանրաքվե անցկացնել: «Ժողովուրդը պետք է իր կարծիքն արտահայտի երկրում տեղի ունեցող զարգացումների վերաբերյալ»,- նշել է Յարոշը: Այս նպատակով կազմակերպության անդամները պատրաստվում են շտաբներ ձևավորել երկրի ամբողջ տարածքում: «Շատ մեծ աշխատանք է սպասվում, այն լինելու է բարդ և երկարատև: Վաղվանից Ուկրաինայի բոլոր շրջաններում, յուրաքանչյուր շրջկենտրոնում ձևավորվելու են հանրաքվեի հարցերվ շտաբներ», -նշել է Յարոշը: Կազմակերպության ղեկավարը նշել է, որ եթե իրենց չհաջողվի հանրաքվե անցկացնել, ապա այն կփորձի ստեղծել իր սեփական Կենտրոնական ընտրական հանձնաժողովը  և Ուկրաինայի ողջ տարածքում առանձին ընտրություններ կանցկացնի: Նրա խոսքով՝ «Աջ սեկտորը» չի պատրաստվում մասնակցել հոկտեմբերի 25-ին կայանալիք տեղական ընտրություններին:

Յարոշը նաև պահանջել է Կիևից ամբողջությամբ շրջափակման ենթարկել Դոնբասը և օրինականացնել կամավորական ջոկոտները: 

Վերլուծաբանները միանգամայն իրատեսական են համարում «Աջ սեկտորի» այս հայտարարությունն, ավելին՝ կարծում են, որ ռազմական բախումը իշխանությունների հետ միանգամայն հնարավոր է: ««Աջ սեկտորի» անդամները վաղուց են խոսում հեղափոխությունը շարունակելու իրենց մտադրության մասին՝ ասելով, որ այն իրենցից գողացել են»,- РИА Новости-ի հետ զրույցում նշել է Ռուսաստանի Հանրային պալատի անդամ Գեորգի Ֆյոդորովը:

Հիշեցնենք, որ «Աջ սեկտորը», որն ինչպես նախօրեին հայտնեց Դմիտրի Յարոշը  ռազմաքաղաքական կազմակերպությունից վերանվանվել է ազգային-ազատագրականի, հանդիսանում է ծայրահեղական և ազգայնական ուկրաինական կազմակերպությունների միություն, որի զինյալները 2014 թվականի փետրվարին մասնակցել են ցուցարարների և ոստիկանության բախումներին, ինչպես նաև վարչական շենքերի գրավմանը:

Ռուսաստանում արգելված ծայրահեղական այս կազմակերպության հայտարարությունը բնականաբար Մոսկվայի կողմից ողջունելի չէ, ավելին՝ այն չի բխում նաև Արևմուտքի շահերից, քանի որ այս կազմակերպությունը բացահայտ ազգայնական, ֆաշիստական տրամադրվածություն ունի, և կարծել, որ իշխանության գալով նրանք կհայտնվեն Արևմուտքի ազդեցության գոտում անիրատեսական է: Այս կապակցությամբ Գերմանիայի ԱԳՆ-ն արդեն նշել է, որ «Աջ սեկտորը» բարդացնում է առանց այդ էլ լարված իրավիճակը: