Եմենի նախագահը վերադարձել է երկիր

• 23.09.2015, 15:00
•  Մերձավոր Արևելք,  Աշխարհ

Եմենի նախագահ Աբդ Ռաբդո Մանսուր Ալ-Հադին̦ ով գրեթե 6 ամիս Սաուդյան Արաբիայում էր գտնվում̦ վերադարձել է Ադեն: Al-Arabiya News-ը̦ հղում անելով իր կառավարական աղբյուրներին̦ հայտնում է̦ որ Հադին նախատեսում է Էյդ Ալ-Ադհա մուսուլմանական տոնը նշել Եմենում̦ ինչից հետո մեկնելու է Նյու Յորք ՄԱԿ-ի Գլխավոր Ասամբլեայում ելույթ ունենալու համար:

Նշենք̦ որ օրեր առաջ ավելի քան 6 ամիս տևած աքսորից հետո Եմենի կառավարությունը ևս վերադարձել է երկիր: Եմենի վարչապետ Խալեդ Բահահը վերադարձել է Ադեն քաղաք̦ որը գտնվում է երկրի հարավում: Ադենը Եմենի նախագահ Մանսուր Հադիի կողմից հայտարարվել է Եմենի ժամանակավոր մայրաքաղաք̦ քանի որ մայրաքաղաք Սանան̦ ինչպես նաև երկրի հյուսիսային շրջանները ներկայումս գտնվում են հութիների վերահսկողության տակ:

Կառավարությունը տարհանվել էր Ադենից դեռևս 2015 թվականի մարտին̦ երբ Ալ-Հութի շարժման զինյալները գրավեցին քաղաքը: Սաուդյան Արաբիայի գլխավորած կոալիցիոն ուժերը հուլիսին ազատագրեցին քաղաքը̦ և հիմա Եմենի վարչապետը և մի քանի նախարարներ վերադառնում են Եմեն իրենց պարտականությունների կատարմանն անցնելու համար: Կոալիցիոն ուժերին հաջողվել է ազատագրել ևս մի քանի հարավային շրջաններ̦ թեև իրավիճակն այս նահանգներում շարունակում է խիստ լարված մնալ, և պարբերաբար տարբեր միջադեպեր են գրանցվում:

Սաուդյան Արաբիայի գլխավորած կոալիցիան շարունակում է ավիահարվածները հութի զինյալների դիրքերի ուղղությամբ: Նախօրեին մայրաքաղաք Սանայի ռմբակոծման հետևանքով ավելի քան 20 մարդ է սպանվել̦ որոնց մեծ մասը խաղաղ բնակիչներ են եղել: Իսկ սեպտեմբերի 19-ին կոալիցիայի իրականացրած ավիահարվածի հետևանքով ևս 30 մարդ էր մահացել: Հարվածի թիրախ էին դարձել Սանայի հին թաղամասերը:

Հիշեցնենք̦ որ օգոստոսին Սաուդյան Արաբիան ցամաքային գործողություններ սկսեց Եմենում և հայտարարեց մայրաքաղաք Սանան գրավելու իր մտադրության մասին: Սաուդական իշխանություններն ավելի քան 130 միավոր զրահատեխնիկա մտցրին Եմեն: Լրատվամիջոցները հայտնում են, որ Եմեն են ժամանում սաուդացի մասնագետները և Սաուդյան Արաբիայում վերապատրաստում անցած ավելի քան 1000 եմենցի զինվորները: Reuters-ի տվյալներով Արաբական Միացյալ Էմիրությունները ևս 4000 զինծառայող ունի Եմենում̦ որոնք կռվում են կոալիցիոն ուժերի շարքում:

ՄԱԿ-ի տվյալներով մարտից հակամարտության հետևանքով գրեթե 5000 մարդ է սպանվել̦ ավելի քան 25 հազարը վիրավորվել են̦ հայտնում է AFP-ն: 25 միլիոն բնակչություն ունեցող Եմենում հակամարտությունն ազդել է ավելի քան 21 միլիոնի վրա: Արդյունքում երկիրը հայտնվել է սովի եզրին: Amnesty International և Human Rights Watch իրավապաշտպան կազմակերպություններն իրենց վերջին զեկույցներում մեղադրել են հակամարտող կողմերին ռազմական հանցագործություններ իրականացնեու մեջ: