Հնդկական ITEC ծրագրի 50-ամյակը Երևանում

• 13.10.2015, 14:52
•  Ասիա,  Հայաստան

Օրերս Երևանում հանդիպում էր կազմակերպվել հնդկական կառավարական ITEC (Indian Technical & Economic Cooperation)՝ հնդկական տեխնիկական և տնտեսական համագործակցության ծրագրի 50-ամյակի կապակցությամբ: Հանդիպմանը հրավիրված էին այս ծրագրի տարբեր տարիների մասնակիցները:

Ինչպես իր ողջույնի խոսքում նշեց ՀՀ-ում Հնդկաստանի արտակարգ և լիազոր դեսպան Ն.Գ. Սուրեշ Բաբուն, «վերջին 15 տարվա ընթացքում այս ծրագրով Հնդկաստանում վերապատրաստում է անցել ավելի քան 300 մասնագետ Հայաստանից: Հիմնականում նրանք մասնակցել են աուդիտի, տեղեկատվական տեխնոլոգիաների, հեռահաղորդակցությունների, գյուղական վայրերի զարգացման, անգլերենի, դեղագործության, շրջակա միջավայրի և էներգիայի վերականգնվող աղբյուրների դասընթացների: Հայաստանին տրվում էր 30 տեղ, սակայն այս տարի՝ 25, իսկ դիմողների քանակն ավելի շատ է: Սակայն մենք կաշխատենք բոլոր հայտերն էլ բավարարել»:

Շնորհավորական խոսքով ելույթ ունեցան կառավարության, արտգործնախարարության ներկայացուցիչները, որոնք նույնպես վերապատրաստում են անցել Հնդկաստանում այս ծրագրով: Այնուհետև իրենց տպավորություններով կիսվեցին նաև մյուս մասնակիցները, որոնք նշեցին, թե ինչպես են այդ դասընթացներն իրենց օգնել մասնագիտական ոլորտում, թե ինչպես է այս հնդկական մթնոլորտն իրենց օգնել անձնական հոգեկան և հոգևոր խնդիրների լուծման հարցում:

Վերջում հայկական և հնդկական պարերով ելույթ ունեցան հայ և հնդիկ կատարողները:

Հիշեցնենք, որ ITEC ծրագրի մեկնարկը տրվել է Հնդկաստանի կառավարության կողմից 1964թ. սեպտեմբերի 15-ին: Այս ծրագրի և նրան հարակից SCAAP (Օգնության հատուկ ծրագիր Հանրակցության և Աֆրիկայի երկրներին) ծրագրի համաձայն, 161 երկրների ներկայացուցիչներին հրավիրում են ուսման, որի հիմքում ընկած է Հնդկաստանի զարգացման փորձը: Ուսուցում է առաջարկվում հետևյալ առարկաներից. աուդիտ, հաշվապահական գործ, տեղեկատվական տեխնոլոգիաներ, հեռահաղորդակցություններ, գյուղական վայրերի զարգացում, անգլերեն, դեղագործություն, շրջակա միջավայր և էներգիայի վերականգնվող աղբյուրներ, բանկային գործ ու ֆինանսներ, ձեռներեցության զարգացում, փոքր և միջին բիզնեսի զարգացում, կրթության ու կառավարման ոլորտի պլանավորում, տեքստիլ գործ և այլն:

Ծրագիրն ամբողջությամբ ֆինանսավորում է Հնդկաստանի կառավարությունը: