Հանրաքվեն պայմանավորված էր քաղաքական շահով. ԵԽԽՎ պատվիրակություն

• 07.12.2015, 17:58
•  Հայաստան

Եվրոպայի Խորհրդի Խորհրդարանական Վեհաժողովի (ԵԽԽՎ) պատվիրակությունը հայտարարել է, որ Հայաստանում սահմանադրական հանրաքվեի անցկացումը «պայմանավորված էր ոչ թե Հայաստանի հասարակության կարիքներով, այլ քաղաքական շահերով, և շատ քաղաքացիների կողմից ընկալվեց ավելի շուտ որպես վստահության քվեարկություն կառավարության հանդեպ, այլ ոչ թե փոփոխության համար»:  Այս մասին հայնում է Մեդիամաքսը:

ԵԽԽՎ միջկուսակցական պատվիրակությունը Հայաստանում է գտնվել դեկտեմբերի 4-ից 7-ը՝  սահմանադրական փոփոխությունների հանրաքվեն մշտադիտարկելու նպատակով: 

Պատվիրակությունը գլխավորում էր ԵԽԽՎ պատգամավոր, Շվեյցարիան ներկայացնող Անդրեաս Գրոսսը: Պատվիրակության կազմում էին նաև պատգամավոր Դորիս Ֆիալան (Շվեյցարիա) և ԵԽԽՎ մոնիտորինգի հանձնաժողովի Հայաստանի պարտավորությունների կատարման հարցով համազեկուցող Ալան Միլը (Մեծ Բրիտանիա): 
«Հանրաքվեին ընտրողների համեմատաբար պասիվ մասնակցությունը՝ բնակչության շուրջ 50 %-ը, վկայում է այն մասին, որ հանրաքվեն անցկացվել է՝ ոչ թե Հայաստանի հասարակության կարիքների, այլ քաղաքական շահերով պայմանավորված: Երկու ու կես տարվա բարեփոխումների գործընթացը բավարար ներառական չի եղել, և խորհրդարանն ընդամենը մի քանի շաբաթ ժամանակ է ունեցել՝ քննարկելու սահմանադրության տեքստը: Հանրային քննարկումների համար նախատեսված ժամանակը ևս սահմանափակ է եղել՝ երկու ամիս»,- ասված է ԵԽԽՎ պատվիրակության եզրակացության մեջ:
Պատվիրակության գնահատմամբ, «սահմանադրական առանցքային փոփոխությունը՝ կառավարման նախագահական համակարգից անցումը դեպի խորհրդարանականի, շատ քաղաքացիներ ընկալել են որպես գործիք, որով գործող նախագահը մտադիր է պահպանել իշխանությունը՝ իր նախագահության երկրորդ և վերջին ժամկետի ավարտից հետո»: 
Պատվիրակությունը նշել է նաև քվեարկության ընթացքում արձանագրված որոշ խնդիրների, մասնավորապես, ընտրացուցակների անճշտության, ընտրակաշառքի և կրկնակի քվեարկության դեպքերի ահազանգերի մասին: