Ալիևյան կլանի դեմ սպառնալիքն իրական է դառնում

• 25.01.2016, 20:36
•  Տարածաշրջան,  Աշխարհ

Ադրբեջանում տնտեսական ճգնաժամը 10 տոկոսով պայմանավորված է նավթի գների անկումով, իսկ մնացած 90 տոկոսը վատ կառավարման արդյունք է, կարծում է ընդդիմադիր Ադրբեջանի Դեմոկրատական կուսակցության առաջնորդ Սարդար Ջալալօղլուն: «Սա ոչ միայն տնտեսական, այլ նաև համակարգային ճգնաժամ է: Քիչ հավանական է, որ կառավարությունը, որը առաջացրել է այս ճգնաժամը, կկարողանա հաղթահարել այն», - նշել է Ջալալօղլուն՝ նախօրեին կուսակցության շտաբում կայացած երկրի տնտեսական խնդիրների վերաբերյալ քննարկումների ժամանակ: Ինչպես տեղեկացնում է contact.az-ը, այդ քննարկումներին մասնակցել են ընդդիմադիր կուսակցությունների, քաղաքացիական հասարակության և լրատվամիջոցների մոտ 200 ներկայացուցիչ:

«Պատճառները պարզ են: Երկիրը խոր ճգնաժամ է ապրում երկրի հարստությունների ավազակապետական իշխանությունների կողմից թալանի հետևանքով: Պետք է կառավարությունից պատասխան պահանջենք», - նշել է Ժողովրդական կուսակցության ղեկավար Փանախ Հուսեյնը: Ադրբեջանի նախկին գլխավոր դատախազ Իհթիյար Շիրինի կարծիքով երկրում տնտեսական ճգնաժամի պատճառը միլիարդավոր միջոցների երկրից դուրս հանումն է: «Դա ոչ միայն սոցիալ-տնտեսական, այլ նաև քրեական բույթի հարց է», - նշել է Շիրինը՝ իշխանություններին կոչ անելով ժողովրդի հետ խոսել ոչ թե սպառնալիքների լեզվով, այլ փորձել ընդհանուր լեզու գտնել վերջինիս հետ:

Սակայն, ինչպես ցույց են տալիս մանաթի արժեզրկման և գնաճի դեմ բողոքի վերջին ակցիաների մասնակիցների ձերբակալությունները, իշխանությունները չեն ցանկանում երկխոսություն սկսել ժողովրդի հետ: Ադրբեջանի իշխանությունները նույնիսկ նման պայթյունավտանգ իրավիճակում չեն ցանկանում փոխել իրենց մարտավարությունը սեփական ժողովրդի նկատմամբ: Ընդդիմության այս քննադատությունը ևս դժվար թե աննկատ անցնի Բաքվի իշխանությունների համար:  Իհարկե, կարճաժամկետ հեռանկարում իշխանությունների նման պահվածքն իրեն արդարացնում է. բողոքի զանգվածային ակցիաները ճնշվել են, սակայն ժողովրդի դժգոհությունը դեռ պահպանվում է, այն ուղղակի արտահայտվում է մեկ ուրիշ ձևով: Այսպես, նախօրեին մի խումբ անհայտ անձիք քարեր է նետել Բաքու ուղևորվող գնացքներից մեկի ուղղությամբ, ինչի հետևանքով 6 մարդ է տուժել:

Իսկ Ժողովրդի մոտ նման տրամադրությունների առկայությունը և ընդդիմության միավորումն արդեն իրական սպառնալիք է Բաքվի իշխանությունների համար: