Թուրքական իրավապաշտպան կազմակերպությունը կոչ է արել պատժել Կարո Փայլանի վրա հարձակվողներին

• 13.05.2016, 10:24
•  Տարածաշրջան

www.cnnturk.com

Թուրքիայի Մարդու իրավունքների միության ռասիզմի և խտրականության դեմ պայքարի հանձնաժողովի Ստամբուլի մասնաճյուղը նամակ է ուղղել Թուրքիայի մեջլիսի նախագահին` մայիսի 2-ին խորհրդարանի հայազգի պատգամավոր Կարո Փայլանի դեմ իրականացված հարձակման հետ կապված:

Asbarez-ը ներկայացնում է ստամբուլյան հանձնաժողովի գրած նամակը.

«Հարգելի՛ պարոն նախագահ,

Մայիսի 2-ին Ազգային մեծ ժողովում ԱԶԿ-ի անդամների իրականացրած ֆիզիկական հարձակումը, որի հետևանքով ԺԴԿ-ի որոշ անդամներ վնասվածքներ են ստացել, հանգամանորեն բացահայտում է այս երկրում օրենքի գերակայության բացակայության մասին:

Խորհրդարանի ԺԴԿ անդամների դեմ ինքնադատաստան հիշեցնող ֆիզիկական հարձակման նախաձեռնողներն աղաղակող հանցագործություն են կատարել այն ժամանակ, երբ ջանքեր են գործադրվում ԺԴԿ-ին դուրս թողնել քաղաքականությունից` ձերբակալելով պատգամավորներին և զրկելով ժողովուրդների ներկայացուցչության հնարավորությունից:

Այս հարձակումը դրսևորումն է նաև ռասայական ատելության: 

ԺԴԿ անդամ Կարո Փայլանի հասցեին ֆիզիկական բռնության ժամանակ նաև ռասայական վիրավորանքներ են հնչել` շեշտելով նրա հայ լինելը:  Նրան ուղղված վիրավորանքների հեղինակները ոչ միայն ցուցադրել են իրենց ռասիստական էությունը, այլև Կարո Փայլանին դարձրել են ռասիստական հարձակումների թիրախ:

ՄԱԿ-ի Ռասայական խտրականության բոլոր ձևերի բացառման մասին միջազգային կոնվենցիան, որն ընդունել է նաև Թուրքիան, թելադրում է կոնվենցիան ստորագրած պետությունների պարտավորությունները` կապված կանխման, հետաքննության, պատժի սահմանման և ռասիստական հարձակումների զոհերին փոխհատուցման հետ:

Հարգելի՛ պարոն նախագահ,

Դուք մասնակից եք դառնում վերոնշյալ հանցագործությանը` ձեր օրակարգից բացառելով  ռասայական հարձակումը, որը տեղի է ունեցել մայիսի 2-ին՝ այն դատապարտման չենթարկելով»: