Իրանը պատասխանել է Էրդողանի՝ «պարսկական ազգայնականություն» եզրույթն օգտագործելուն

• 16.02.2017, 18:37
•  Տարածաշրջան,  Աշխարհ

The New York Times

Իրանի արտգործնախարարությունը պատասխանել է Էրդողանի այն հայտարարությանը, որտեղ վերջինս մեղադրել էր Թեհրանին Իրաքը և Սիրիան մասնատելու մտադրություն ունենալու մեջ` խոսքի մեջ օգտագործելով «պարսկական ազգայնականություն» եզրույթը:

Ինչպես հաղորդում է Ermenihaber-ը՝ հղում կատարելով թուրքական «Doğan» լրատվական գործակալությանն Իրանի արտգործնախարարության տարածած հայտարարության մեջ ասվում է, որ Իրաքում Իրանի ներկայությունը հիմնված է այդ երկրի օրինական իշխանության խնդրանքի վրա և նպատակ ունի պայքարել այն ահաբեկչության դեմ, որի վատ հետևանքները բազմիցս թափանցել են մինչև Թուրքիայի սիրտը:

«Իրանի առաջնահերթությունը տարածաշրջանի անվտանգության և կայունության ապահովումն է: Այս խնդիրը չի կարող լուծվել առանց տարբերելու ահաբեկիչներին աջակցող քաոսի դերակատարներին և իրական կայունություն ցանկացողներին:

Տարածաշրջանի առաջնորդների շարքում պարոն Էրդողանը ամենից լավը պետք է իմանա տարածաշրջանում ու հատկապես Իրաքում Իրանի կառուցողական դերի մասին:

Մտահոգիչ է տարածաշրջանի ահաբեկչական խմբավորումներին բացահայտ կամ գաղտնի կերպող աջակցելն ու օգտագործելը, հարևան երկրների տարածքային ամբողջականությունն ու ինքնիշխանությունը չհարգելը, որոնք էլ դառնում են տարածաշրջանի անկայունության շարունակման պատճառ»,- ասված է հայտարարության մեջ: