Մարգար Եսայանը մեծ հաջողություն է համարում Թուրքիայում ծնված լինելը. հայերն արձագանքել են

• 22.10.2017, 16:54
•  Տարածաշրջան,  Աշխարհ

Asbarez.com

Թուրքիայի իշխող «Արդարություն և զարգացում» (AKP)  կուսակցության հայ պատգամավոր Մարգար Եսայանի թվթիերյան գրառումն առ այն, որ մեծ հաջողություն է Թուրքիայում ծնված լինելը զայրացրել է Թուրքիայում ապրող հայերի և այլ քրիստոնյաների։

«Պնդում եմ, որպես քրիստոնյա, որ մեր հավատքով ու ինքնությամբ ամենաազատը ապրում ենք Թուրքիայում։ Մեծ հաջողություն է, որ ծնվել ենք Թուրքիայում»,-գրել է Մարգար Եսայանը Twıtter-ում, փոխանցում է News.am-ը:

Այս գրառումը կատաղեցրել է Թուրքիայում ապրող մի շարք հայ և այլ քրիստոնյա օգտատերերի։

Մասնավորապես,ասորական «Սաբռո» թերթի պատասխանատուն Մարգար Եսայանի գրածի տակ ավելացրել է. «Դրա համար էլ հունական հոգևոր դպրոցը փակ են պահում, ասորիներից բռնազավթված ունեցվածքը հանձնում մուսուլմաններին, դրա համար Թուրքիայում հայ անունը հայհոյանք է...»։

Հայ օգտատերերից Րաֆֆին էլ ավելացրել է. «Մարգար, սրա փոխարեն ավելի լավ է՝ գնա, բուլկի վաճառի, գոնե պատվով փող կվաստակես այդ դեպքում»։

Իսկ թուրք օգտատերերից մեկն էլ գրել է. «Քանի՞ լիրայով ես գրել այս խոսքերը։ Ոչ քո շեֆ Էրդողանը կապ ունի իսլամի հետ, ոչ էլ դու կապ ունես քրիստոնեության ու Աստվածաշնչի հետ»։