Մեր և ԵԺԿ գործընկերների ջանքերով ադրբեջանական առաջարկը մերժվեց. Կարինե Աճեմյան (ԲԱՑԱՌԻԿ)

• 01.11.2017, 18:00
•  Եվրոպա,  Աշխարհ,  Հայաստան,  Հարցազրույց

ArmLur.am

Կիևում շարունակվում են «Եվրանեսթ» Խորհրդարանական Վեհաժողովի աշխատանքները։ «Եվրանեսթ» ԽՎ-ում հայկական պատվիրակության աշխատանքների վերաբեյալ «Արմեդիա» ՏՎԳ-ն զրուցել է պատվիրակության անդամ, ՀՀ Ազգային Ժողովի Հանրապետական խմբակցության պատգամավոր Կարինե Աճեմյանի հետ: 

-  Տիկի´ն Աճեմյան, ընթանում են «Եվրանեսթ» ԽՎ-ի աշխատանքները, ինչպիսի՞ ակտիվություն է դրսևորում հայկական պատվիրակությունը: Ի՞նչ խնդիրներ են բարձրաձայնվում:

-  Բարեբախտաբար այս անգամ գրեթե ամբողջ պատվիրակությունը ներկայացված է, միայն հարգելի պատճառներով պատվիրակությունից երկու հոգի է բացակայում: Կարծում եմ, որ մեր պատվիրակության գրեթե ամբողջ կազմով ներկայացվածությունը շատ կարևոր դերակատարում ունի, քանի որ բոլոր հարցերի հետ կապված աշխատանքները շատ ավելի համախմբված, կառուցողական և նպատակային են: Նույնիսկ ուկրաինական պատվիրակության ղեկավարը նշեց, որ շատ հաճելի է կողքից տեսնել համախմբված և ակտիվ աշխատող պատվիրակություն:

Պատվիրակության կազմը կարևոր է այն առումով, որ մենք տարբեր հանձնաժողովներում միաժամանակ տարբեր քննարկումներ ենք ունենում, լինում են քվեարկություններ և այդ առումով շատ կարևոր է պատվիրակության կազմի լիարժեք ներկայացվածությունը՝ և´ ակտիվության, և´ քանակի առումով:

Պետք է նշեմ, որ ցանկալի կլիներ, որ մեր եվրոպացի գործընկերները, ովքեր «Եվրանեսթի» ստեղծման նախաձեռնողներից են եղել, այստեղ լինեին ավելի ներկայացուցչական կազմով: Այս անգամ նրանց թիվը համեմատաբար փոքր է, ինչը չի կարող դրական անդրադառնալ կառույցի աշխատանքների վրա: Ավելի ակտիվ և լիարժեք աշխատանք իրականացնելու համար կարևոր է նաև մեր Եվրախորհրդարանի գործընկերների ներկայությունն այստեղ:

-  Իսկ ինչո՞վ է պայմանավորված եվրոպացի պատգամավորների փոքր կազմով ներկայացվածութունը:

-  Միանշանակ ասել չեմ կարող: Հնարավոր է, որ դա կապված լինի Կիևում տեղի ունեցող զարգացումների հետ, հնարավոր են նաև այլ պատճառներ, որոնք մեզ հայտնի չեն: Այնուամենայնիվ, հետագայում ևս աշխատանքների արդյունավետության համար, կարծում եմ, շատ կարևոր է նրանց ներկայությունը:

-  Տիկի´ն Աճեմյան, «Եվրանեսթ» ԽՎ-ի շրջանակներում տեղի է ունեցել նաև Եվրոպական ժողովրդական կուսակցության հանդիպումը: Ինչպե՞ս կգնահատեք այդ հանդիպման արդյունավետությունը:

-  Որպես ՀՀԿ անդամ՝ մասնակցել եմ Եվրոպական ժողովրդական կուսակցության (ԵԺԿ) հանդիպմանը: Քննարկել ենք տարբեր հարցեր, բոլոր պատվիրակությունների նախաձեռնությունների, զեկույցների վերաբերյալ հայտնել ենք մեր դիրքորոշումը: Օրինակ՝ Սոցիալական հանձնաժողովում ադրբեջանական կողմը մեզ համար անընդունելի մի առաջարկությամբ էր հանդես եկել, որը Ղարաբաղյան խնդրին էր վերաբերում: Սակայն, մեր և ԵԺԿ գործընկերների ջանքերով  ադրբեջանական առաջարկը մերժվեց:  

Ընդհանուր առմամբ պետք է նշեմ, որ բոլոր հանձնաժողովներում մեր աշխատաքներն իրենց արդյունքը տվեցին. մեր առաջարկներն ընդունվեցին, իսկ այն առաջարկները, որոնք չէին բխում մեր շահերից, դուրս եկան: Այդ առումով մեր աշխատանքը շատ դրական ու արդյունավետ եմ գնահատում:

Նման ձևաչափով հանդիպումները, քննարկումները, նաև մեր եվրոպական գործընկերների հետ անձնական շփումները կարևոր են, որպեսզի հետագայում միջազգային մյուս կառույցներում կարողանանք մեզ համար կարևոր հարցերի հետ կապված ապահովել նույնատիպ դիրքորոշում և ունենալ ընկերներ, որոնք մեզ կաջակցեն: