Աֆրինում թուրքամետ ուժերը կողոպտում են խաղաղ բնակիչների տները (տեսանյութ)

• 08.02.2018, 20:02
•  Մերձավոր Արևելք,  Աշխարհ

Հունվարի 20-ին Թուրքիայի բանակի ստորաբաժանումների հետ Սիրիայի քրդական Աֆրին շրջան ներխուժած «Սիրիայի ազատ բանակ» (ՍԱԲ) կոչվող խմբավորումների զինյալները կողոպտում են խաղաղ բնակիչների տները:

Ինչպես հայտնում է Ermenihaber-ը՝ քրդական «ANF» լրատվական գործակալության հրապարակած տեսանյութում երևում է, թե ինչպես են Աֆրինի Ռաջո շրջանի մի գյուղում զինյալները գողանում բնակիչների հավերն ու հնդկահավերը: Աղբյուրի հաղորդմամբ՝ արաբերեն խոսող զինյալներն իրար հետ խոսելիս ասում են «Քրդի մալը (ապրանքը) հալալ է»:

Նշվում է, որ նմանատիպ դեպքերը հաճախակի բնույթ են կրում. «Ձիթենու ճյուղ» անվանումով ռազմագործողության սկզբից ի վեր կողոպտվել են Աֆրինի սահմանային գյուղերի շատ բնակիչների տներ ու անասնագոմեր:

Քրդական գործակալության տվյալներով Թուրքիայի նախաձեռնած գործողության հետևանքով 20 օրերի ընթացքում զոհվել է շուրջ 150 խաղաղ բնակիչ: