Թուրքիայում 3 լեզու է արդեն անհետացել, ևս 15-ը՝ անհետացման վտանգի մեջ են

• 22.02.2018, 20:32
•  Տարածաշրջան,  Աշխարհ

UNESCO-ի ամենամյա զեկույցում՝ Թուրքիային նվիրված բաժնում, թվարկվել են բոլոր այն 15 լեզուները, որոնք անհետացման եզրին են հայտնվել Թուրքիայում:

Ինչպես հայտնում է Ermenihaber-ը,  զեկույցի համաձայն՝ 3 լեզու արդեն անհետացել է Թուրքիայում։ Դրանք են՝ Կապադովկիայի հունարենը, ուբիխյան լեզուն, որն օգտագործվում էր Թուրքիայի արևելքում և հյուսիսբոհտանյան  մահսո լեզուն, որն արամեական ծագում ունի։

Անհետացման վտանգի մեջ հայտնված լեզուներն են. համշեներենը, գագաուզերենը, սեֆարդի հրեաների լեզուն, թուրոյա լեզուն (օգտագործվում է Մարդինի Միդյաթ շրջանում), աբխազերենը, լազերենը, չերքեզերենը, պոնտական հունարենը, գնչուների կողմից կիրառվող սինտի լեզուն և այլն:

Նշենք, որ Թուրքիան Նեպալի, Պակիստանի, Բանգլադեշի, Գվատեմալայի ու մի շարք այլ երկրների հետ հայտնվել է այն երկրների շարքում, որոնք թեև իրենց տարածքում ունեն  բազմաթիվ լեզուներ, այնուամենայնիվ, պետական կրթական ծրագրով դասավանդում են միայն մեկ լեզու: