Հայոց Էրատո թագուհին ներառվել է հայտնի Total War: Rome 2 խաղի նոր տարբերակում

• 10.03.2018, 16:22
•  No-politics

YouTube

Կանանց միջազգային տոնի առթիվ հայտնի Total War: Rome 2 խաղի թողարկած նոր՝ Desert Kingdoms տարբերակում ներառված են հին աշխարհի կին առաջնորդները՝ այդ թվում նաև հայկական Էրատո թագուհին: Այս մասին հայտնում է PANArmenian-ը` հղում կատարելով Polygon կայքին:

Խաղի այդ տարբերակում ներառված են նաև Եգիպտոսի թագուհի Կլեոպատրան, հույն թագուհի Տեուտան և այլ կին առաջնորդներ:

Նշենք, որ Էրատո Հայոց թագուհին եղել է Արտաշեսյան արքայատոհմի վերջին գահակալը, Տիգրան 4-րդ-ի քույրը, ում հետ ժառանգել է հոր գահը։ Հռոմի Օգոստոս կայսրը մ.թ.ա. 5 թվականին բռնությամբ Հայոց գահին է նստեցնում Արտավազդ 3-րդ-ին։ Հայերն ապստամբում են  և Պարթևաց արքայի սատարմամբ մ.թ.ա. 2 թվականին Էրատոին և եղբորը վերահաստատում են գահին։

Մ.թ. 1 թվականին Հայաստան ներխուժած հյուսիսային ցեղերի հետ ընդհարման ժամանակ Տիգրան 4-րդ-ը զոհվում է, իսկ Էրատոն հրաժարվում թագավորելուց։ Էրատոյի և Տիգրան 4-րդ-ի անունով պահպանվել են պղնձե դրամներ։