Կորեաների հնարավոր մերձեցումը՝ պատմական իրադարձություն

• 05.05.2018, 18:00
•  Ամերիկա,  Ասիա,  Աշխարհ

TnYG

Ապրիլի 27-ին տեղի ունեցավ Հյուսիսային Կորեայի առաջնորդ Կիմ Չեն Ընի և Հարավային Կորեայի նախագահ Մուն Չժե Ինի պատմական հանդիպումը երկրու երկրի սահմանի դեմարկացիոն գոտում գտնվող Փհանմունջոն գյուղում: Սա տեղի ունեցավ այն բանից հետո, երբ ապրիլի 21-ին ԿԺԴՀ-ն հայտարարեց, որ դադարեցնում է միջուկային զենքի և բալիստիկ հրթիռների փորձարկումները և փակում է Փհունգերի միջուկային զորավարժարանը:

Կիմ Չեն Ընը, փաստորեն, հյուսիսկորեական առաջին առաջնորդն էր, ով հատեց երկու Կորեաների սահմանը և գնաց Հարավի հետ բանակցելու:

Կողմերն ի սկզբանե շատ դրական և լավատեսորեն են տրամադրված եղել բանակցությունների նկատմամբ՝ հայտարարելով, որ երկու երկրների միջև սկսվում է խաղաղության և բարգավաճման նոր պատմական ժամանակաշրջան:

Հանդիպման ժամանակ քննարկված հարցերից առաջնային են եղել Հյուսիսի և Հարավի միջև հարաբերությունների կարգավորումը, և դրանց վերամիավորման հեռանկարները: Կողմերն ընդունել են համատեղ հռչակագիր՝ հայտնելով իրենց մտադրությունը Կորեական թերակղզու ապամիջուկայնացման, հարաբերությունների բարելավման վերաբերյալ, ինչպես նաև համատեղ զարգացման և վերամիավորման ցանկություն են հայտնել: Կիմ Չեն Ընը հայտնել է, որ երբ ԱՄՆ-ի հետ պատերազմը պաշտոնապես ավարտվի, Հյուսիսային Կորեայի համար միջուկային զենք ունենալն անիմաստ կլինի: Հյուսիսի առաջնորդը միջուկային օբյեկտների ստուգումները թույլատրելու պատրաստակամություն է հայտնել:

Հանդիպումը ողջունել և երկու Կորեաների միջև հետագա դրական զարգացումների հույս են հայնտնել ԱՄՆ-ը, Ռուսաստանը, Հնդկաստանը, Ճապոնիան, որոնք ուղղակիորեն ներգրավված են տարածաշրջանում, ինչպես նաև ՄԱԿ-ի գլխավոր քարտուղար Անտոնիա Գուտերեշը, ԵՄ-ն, ԵԱՀԿ-ն, Թուրքիան, Գերմանիան:

ԱՄՆ-ում հայտնել են, որ շուտով նախագահ Թրամփը կհանդիպի ԿԺԴՀ առաջնորդ Կիմ Չեն Ընի հետ: Պենտագոնի ղեկավար Ջեյմս Մետիսի խոսքով՝ իրենք պատրաստ են զինված ուժերը դուրս բերել Կորեական թերակղզուց, սակայն Հարավային Կորեայի նախագահը կտրականապես դեմ է դրան:

Բացի այդ, նախատեսվում է անցկացնել նաև եռակողմ գագաթաժողով՝ Կորեայի Հանրապետություն-ԿԺԴՀ-ԱՄՆ ձևաչափով, որն, ըստ լրատվամիջոցների, կանցկացվի սույն տարվա հունիս-հուլիս ամիսներին:

Այսպիսով, երկարատև լարվածությունից հետո երկու Կորեաների միջև հարաբերությունների ջերմացումը, անշուշտ, պատմական իրադարձություն է, որը որքան ուրախալի, նույնքան զարմանալի է: Միջազգային արձագանքներն այս ջերմացմանը մինչ այժմ միանշանակ դրական են եղել. միջազգային հանրությունը համոզված է, որ դիվանագիտության միջոցով հնարավոր է կարգավորել ցանկացած հակամարտություն, իսկ Կորեաների միջև հարաբերությունների կարգավորումը կարևոր և խիզախ քայլ է:

ԱՄՆ-ում վստահ են, որ Կորեաների միջև հարաբերությունների ջերմացումը տեղի է ունեցել ԱՄՆ-ի քաղաքականության շնորհիվ, որին հաջողվել է հասնել նման դրական զարգացումների:

ԱՄՆ Կոնգրեսի Ներկայացուցիչների պալատի հանրապետական 18 կոնգրեսական պաշտոնապես դիմել են Նոբելյան կոմիտե՝ նախագահ Դոնալդ Թրամփին խաղաղության նոբելյան մրցանակ շնորհելու դիմումով՝ Կորեաների միջև հարաբերությունների կարգավորման գործում վերջինիս ջանքերի և ունեցած ներդրման համար: