Brexit-ի շուրջ նոր բանակցություններ չեն լինի. ԵՄ

• 14.12.2018, 10:54
•  Եվրոպա,  Աշխարհ

EPA-EFE/OLIVIER HOSLET

Եվրախորհուրդն իր եզրակացություններում հավաստել է 2018 թվականի նոյեմբերի 25-ի սեփական որոշումը, որով հավանություն է տվել Brexit-ի վերաբերյալ համաձայնագրին և հաստատել քաղաքական հռչակագիրը, փոխանցում է Интерфакс-ը:

«Միությունը պաշտպանում է այդ համաձայնագիրը և մտադիր է ձեռնամուխ լինել դրա վավերացմանը: Այն համաձայն չէ կրկնական բանակցություններին»,- ասվում է Բրյուսելում ԵՄ-ի գագաթաժողովի նիստերի առաջին օրվա արդյունքում տարածված եզրակացությունների տեքստում:

Եվրախորհրդում հաստատել են Brexit-ից հետո Լոնդոնի հետ առավելագույն սերտ հարաբերություններ հաստատելու և այդ հարցի շուրջ ԵՄ-ից Մեծ Բրիտանիայի դուրս գալուց անմիջապես հետո բանակցություններ սկսելու պատրաստակամությունը:

Տեքստում նշվում է, որ ԵՄ-ն պնդում է Իռլանդիայի և Հյուսիսային Իռլանդիայի միջև սահմանի կարգավիճակի վերաբերյալ ժամանակավոր որոշման ճիշտ լինելը, որը վեճերի  է առաջացրել բրիտանացի քաղաքական գործիչների շրջանում: Եվրախորհուրդը նաև պատրաստակամություն է հայտնում այդ պլանի գործարկման դեպքում Մեծ Բրիտանիայի հետ բանակցություններ վարել սահմանի խնդրի լուծման այլընտրական տարբերակների շուրջ: