Ռուսաստանը կրկին ակտիվացնում է միջնորդությունը բանակցային գործընթացում

• 11.04.2019, 14:39
• Աննա Կարապետյան
•  «Հայացք» վերլուծական կենտրոն,  Հայաստան,  ԼՂՀ,  Վերլուծություն

Հայտնի է Հայաստանի և Ադրբեջանի արտաքին գործերի նախարարների հանդիպման օրը՝ ապրիլի 15: Ելնելով Փաշինյան-Ալիև վերջին հանդիպման ամփոփումներից՝ տրամաբանական է ակնկալել, որ արտաքին գործերի նախարարները շարունակելու են կարգավորման սկզբունքների և դրանց ընկալումների «պարզաբանման» գործընթացը, ինչպես նաև փորձելու են հստակեցնել բանակցային գործընթացի հետագա ընթացքը:

Սակայն, այս փուլում առավել ուշագրավը հանդիպման ձևաչափն է, մասնավորապես՝ այն, որ հանդիպումը տեղի է ունենալու Ռուսաստանի ԱԳ նախարար Սերգեյ Լավրովի միջնորդությամբ:

Հայաստանում տեղի ունեցած իշխանափոխությունից հետո սա առաջին հանդիպումն է Ռուսաստանի անմիջական միջնորդությամբ՝ չհաշված Մոսկվայում Ալիևին և Փաշինյանին ծանոթացնելը: Հայաստանի և Ադրբեջանի ղեկավարների և ԱԳ նախարարների հանդիպումները մինչ այժմ տեղի են ունեցել կամ առանց միջնորդների, կամ ԵԱՀԿ ՄԽ համանախագահների միջնորդությամբ:

Ռուսաստանի միջնորդությունը բանակցային գործընթացում նորություն չէ, նման ակտիվ միջնորդություն եղել է Կազանի հանդիպման նախապատրաստական փուլում, ինչպես նաև Ապրիլյան պատերազմից հետո, երբ Սանկտ-Պետերբուրգում հայտարարություն ընդունվեց հրադադարի ամրապնդման վերաբերյալ:

Ռուսաստանի միջնորդությունն այս փուլում կարող է միաժամանակ մի քանի ազդակ պարունակել իր մեջ:

Առաջինը, Ռուսաստանը, որպես միջնորդ, եթե վերջին տարվա ընթացքում բավական պասիվ էր և հստակ քայլեր չէր ձեռնարկում, ապա այժմ ակտիվանում է, և սկսելու է կրկին ինտենսիվ զբաղվել կարգավորման գործընթացի առաջմղմամբ:

Եվ երկրորդը, ելնելով անցյալի փորձից, կարող ենք ենթադրել, որ ի դեմս Ռուսաստանի ակտիվանալու է ճնշումը կողմերի վրա՝ ծանոթացումներից և հայտարարություններից ավելի հստակ գործողությունների անցնելու համար: Ի դեպ, այդ մասին հիշատակվում էր նաև մարտի 29-ի Վիեննայի հանդիպման ամփոփիչ հայտարարության մեջ՝ երկու առաջնորդները պայմանավորվել էին հստակ քայլեր ձեռնարկել բանակցային գործընթացում:

Ուստի, այս հանդիպումը կարող է բանակցային գործընթացի այս փուլում բավական շոշափելի ազդակ ծառայել՝ օրակարգը հստակեցնելու և հստակ քայլեր ձեռնարկելու ուղղությամբ: