Արցախի չճանաչվածությունը չպիտի խոչընդոտ լինի արցախցիների իրավունքների պաշտպանության համար

• 13.04.2019, 15:16
• Հերմինե Մխիթարյան
•  Եվրոպա,  «Հայացք» վերլուծական կենտրոն,  Աշխարհ,  ԼՂՀ

Վարչապետ Նիկոլ Փաշինյանը ԵԽԽՎ-ում ունեցած իր ելույթում անդրադարձավ նաև Արցախում Եվրոպայի խորհրդի և, մասնավորապես, Եվրոպայի խորհրդի խորհրդարանական վեհաժողովի անելիքներին: Վարչապետի ելույթով կրկին շեշտվեց Արցախում ժողովրդավարական ինստիտուտների ամրապնդման և քաղաքացիական հասարակության կայացման գործում եվրոպական կառույցների աջակցության կարևորությունը:

Արցախում մարդու իրավունքների և ժողովրդավարության կայացման գործում եվրոպական կառույցների աջակցության մասին բավական շատ է խոսվել: Մարդու իրավունքներն ու հիմնարար ազատությունները եվրոպական արժեհամակարգի հիմնասյուներն են: Դրանք համընդհանուր արժեք են և չպիտի ընտրովի կիրառվեն ու մեկնաբանվեն, առավել ևս՝ տարածքի քաղաքական կարգավիճակը չի կարող խոչընդոտ դառնալ այնտեղ ապրող մարդկանց իրավունքների պաշտպանության համար: Հատկանշական է, որ Եվրոպայի խորհրդի գաղափարական հիմքում հենց այս արժեքներն են:

Անշուշտ, Եվրոպան անելիքներ ունի Արցախում, որտեղ ժողովրդավարությունն ու մարդու իրավունքների պաշտպանությունը հռչակված են, որպես կարևոր առաջնահերթություններ: Բավական է միայն հիշել, որ Արցախը դեռ 2015 թվականից որդեգրել է միջազգային կոնվենցիաներին միակողմանիորեն միանալու քաղաքականություն՝ շարունակաբար բարելավելով երկրում ժողովրդավարության մակարդակը: Եվ այս ամենը սեփական ուժերով` առանց միջազգային կառույցների աջակցության ու հովանավորության:

Արցախում քաղհասարակության կայացման գործում մեծ դեր ու նշանակություն կարող են ունենալ եվրոպական կառույցներն ու իրավապաշտպան կազմակերպությունները: Կարևոր է հստակեցնել, որ աշխատանքն արցախյան հասարակական կազմակերպությունների, քաղաքացիական հասարակության ներկայացուցիչների հետ չի պահանջում Արցախի միջազգային ճանաչում: Այստեղ խնդիրն առաջին հերթին արժեքային դաշտում է: Իսկ իր արժեքներով ու արժեհամակարգով, ընտրած զարգացման ու առաջընթացի կուրսով Արցախը, անկասկած, Եվրոպայի մաս է: