Վրաստանի ՆԳ նախարարն ասել է, թե երբ պաշտոնաթող կլինի

• 28.06.2019, 11:30
•  Տարածաշրջան,  Աշխարհ

Ministry of Internal Affairs of Georgia / FB

Վրաստանի ներքին գործերի նախարար Գեորգի Գախարիան, որի հրաժարական են պահանջում Թբիլիսում հազարավոր ցուցարարներ արդեն մոտ մեկ շաբաթ, հայտարարել է, որ  պաշտոնից կհեռանա, երբ իր անձը վնաս հասցնի կառավարող թիմին, փոխանցում է Sputnik-Грузия-ն: 

Թբիլիսիում հանրահավաքների մասնակիցները Գախարիային մեղադրում են հունիսի լույս 21-ի գիշերն ակցիան դաժանորեն ցրելու մեջ. ՆԳՆ-ն ակցիայի մասնակիցների դեմ կիրառել էր արցունքաբեր գազ և ռետինե գնդակներ: Ոստիկանությունը ակցիան ցրելու գործողությունն սկսել է խորհրդարանի շենքի գրոհին դիմադրելուց երկու ժամ անց: Անկարգությունների հետևանքով տուժել 240 մարդ, այդ թվում՝ 80 ոստիկան: 

«Ինձ համար հրաժարականը խնդիր չէ, ես կարող եմ հեռանալ վաղը, վաղը չէ մյուս օրը կամ մյուս օրը չէ մյուս օրը … Հենց որ ես՝ որպես այս (ՆԳՆ-ի ղեկավարի – խմբ.) պաշտոնում գործող անձ, վնասաբեր գործոն դառնամ թիմի համար, մենք կլուծենք այդ հարցը»,- ասել է Գախարիան՝ պատասխանելով այն հարցին, թե ինչու է ինքը մնում այդ պաշտոնում, չնայած մարդկանց պահանջին: