Ղարաբաղյան հակամարտությունը ռազմական լուծում չունի. Դոնալդ Տուսկ

• 10.07.2019, 15:45
•  Եվրոպա,  Աշխարհ,  Հայաստան

Վարչապետ Նիկոլ Փաշինյանը և Եվրոպական խորհրդի նախագահ Դոնալդ Տուսկը Հայաստանի կառավարությունում կայացած բանակցություններից հետո հանդես են եկել ԶԼՄ ներկայացուցիչների համար հայտարարություններով:

Ստորև ներկայացվում է հայտարարությունների տեքստի սղագրությունն ամբողջությամբ.

Հայաստանի Հանրապետության վարչապետ Նիկոլ Փաշինյան- Մեծարգո պարոն նախագահ,
լրատվամիջոցների հարգարժան ներկայացուցիչներ,
տիկնայք և պարոնայք,

Ես անչափ ուրախ եմ ողջունել նախագահ Տուսկին Հայաստանում: Համեմատաբար կարճ ժամանակահատվածում ես մի քանի առիթ եմ ունեցել հանդիպելու պարոն Տուսկին: Մեր բոլոր շփումները շատ տպավորիչ են եղել՝ անցնելով բարեկամության և կառուցողական երկխոսության մթնոլորտում:

Այսօր ևս մենք ունեցանք շատ արդյունավետ քննարկում: Անդրադարձանք Հայաստան–Եվրոպական միություն հարաբերություններին վերաբերող հարցերի լայն շրջանակի: Մտքերի փոխանակում ունեցանք քաղաքական և ճյուղային, այսպես կոչված, սեկտորալ համագործակցությանը, ինչպես նաև Հայաստանի ներքին կյանքին և տարածաշրջանային զարգացումներին վերաբերող հարցերի շուրջ:

Ես վերահաստատեցի օրենքի գերակայության և ժողովրդավարության ամրապնդման, ինչպես նաև կոռուպցիայի դեմ պայքարի Հայաստանի իշխանությունների որդեգրած հանձնառությունը:

Հանդիպման ընթացքում ես նաև խոսեցի Հայաստանում իրականացվող բարեփոխումների մասին՝ հիշատակելով անկախ դատաիրավական համակարգ կառուցելու ուղղությամբ մեր ներկայիս գործադրած ջանքերը: Ընդգծեցի, որ այդ առումով Հայաստանը մեծապես կարևորում է եվրոպական հաստատությունների, այդ թվում՝ ԵՄ աջակցությունը և հայտնում իր երախտագիտությունը ցուցաբերվող օժանդակության և գաղափարական զորակցության համար:

Ընդգծեցի ԵՄ և ԵՄ անդամ պետությունների հետ համագործակցության ընդլայնման վերաբերյալ Հայաստանի իշխանությունների քաղաքական հանձնառությունը:

Երկուստեք նշվեց Հայաստան-ԵՄ Համապարփակ և ընդլայնված գործընկերության մասին պայմանագրի մեծ նշանակությունը և եվրոպական երկրների կողմից այն շուտափույթ վավերացնելու կարևորությունը:

Տվյալ պայմանագիրը մի գործիք է, որի իրականացումը ոչ միայն նպաստելու է Հայաստան-ԵՄ հարաբերությունների զարգացմանը, այլ նաև օգնելու է Հայաստանի իշխանությունների բարեփոխումների օրակարգի իրականացմանը:

Այս առումով ես ցանկանում եմ տեղեկացնել, որ Հայաստանի կառավարության գերատեսչությունները Եվրամիության համապատասխան մարմինների հետ համագործակցությամբ մշակել են Համապարփակ և ընդլայնված գործընկերության մասին պայմանագրի իրականացման Ճանապարհային քարտեզը: Այն իմ կողմից հաստատվել է հունիսի 1-ին՝ Պայմանագրի ժամանակավոր կիրառման սկզբից ուղիղ 1 տարի անց: Հունիսի 13-ին Պայմանագիրն արժանացավ նաև Հայաստան-ԵՄ գործընկերության խորհրդի երկրորդ հանդիպման հավանությանը:

Մենք անդրադարձանք նաև Հայաստան- Եվրամիություն մուտքի արտոնագրերի ազատականացման վերաբերյալ երկխոսություն սկսելու խնդրին: Իմ կողմից նշվեց Հայաստանի շահագրգռվածությունն այս հարցում, հատկապես, միջանձնային շփումների ընդլայնման անհրաժեշտության տեսանկյունից: Ես դիմեցի նախագահ Տուսկին՝ Եվրամիության անդամ պետություններին այս ուղերձը փոխանցելու խնդրանքով:

Անդրադարձ եղավ նաև Արևելյան գործընկերությանը, որն այս տարվա մայիսին նշեց իր հիմնադրման 10-րդ տարեդարձը:

Մենք զրուցեցինք նաև տարածաշրջանային խնդիրների մասին: Երախտագիտություն հայտնեցի ԵՄ կողմից Լեռնային Ղարաբաղի հակամարտության կարգավորման հարցում հավասարակշռված դիրքորոշում ցուցաբերելու և ԵԱՀԿ Մինսկի խմբի համանախագահների դիրքորոշումն աներկբայորեն պաշտպանելու համար: Համոզվածություն հայտնեցի ԵՄ այս կեցվածքի շարունակականության հարցում:

Ավարտելով խոսքս, հարգելի գործընկերներ, ցանկանում եմ նախագահ Տուսկին վերստին շնորհակալություն հայտնել արդյունավետ համագործակցության համար:

Օգտվելով առիթից՝ ցանկանում եմ նաև մեր բոլորի անունից հաջողություն և նորանոր ձեռքբերումներ մաղթել նրան ապագա գործունեության մեջ:

Եվրոպական խորհրդի նախագահ Դոնալդ Տուսկ - Շնորհակալություն, սիրելի պարոն վարչապետ, Ձեր ջերմ ողջույնի և մեր գերազանց քննարկումների համար:

Սա իմ առաջին այցելությունն է Երևան Հայաստանի խաղաղ հեղափոխությունից ի վեր: Ուրախ եմ հիմա գտնվել այստեղ, և Հայաստանի դրական դինամիկան նոր հնարավորություններ է ստեղծել մեր համագործակցության համար: Իմ այցելությունն ապացույցն է այն կարևորության, որը Եվրամիությունը վերագրում է Հայաստանի և տարածաշրջանի հետ մեր հարաբերություններին:

Մեր այսօրվա քննարկումն ընդգծեց մեր գործընկերության համաձայնագրի արդյունավետ իրականացումը: Այն հավակնոտ համաձայնագիր է, որը սատարում է Հայաստանի արդիականացմանը: Եվրոպական միությունը կշարունակի տրամադրել տեխնիկական և ֆինանսական օժանդակություն այս համաձայնագրի իրականացման համար:

Վարչապետը և ես նաև համաձայնեցինք, թե որքան կարևոր է օրենքի գերակայությունը, կոռուպցիայի դեմ պայքարը և մարդու իրավունքների հանդեպ հարգանքը: Եվրամիությունը ողջունում է անկախ, արդյունավետ և հաշվետու դատական համակարգ ստեղծելու նկատմամբ ուշադրությունը: Կուռ դատական համակարգն էական բաղադրիչ է ժողովրդավարության հասնելու և տնտեսական ու սոցիալական զարգացման համար: Այստեղ ևս Եվրամիությունը շարունակելու է աջակցել փորձագիտական օժանդակությամբ և լրացուցիչ ռեսուրսները մոբիլիզացնելով:

Մենք քննարկեցինք նաև մասնագիտացված հակակոռուպցիոն հանձնաժողովի ստեղծումը:

Ճանաչելով կառավարության բարեփոխումների ուղղությամբ ջանքերը՝ Եվրամիությունը համարյա կրկնապատկել է 2019 թվականի համար մեր օժանդակությունը Հայաստանին: Այս միջոցները կօգնեն գերակա ծրագրեր իրականացնել, ներառյալ ենթակառուցվածքային և բնապահպանական: Այս համատեքստում ես սպասում եմ Սևանա լիճ իմ այսօրվա այցելությանը: Եվրամիությունն այստեղ սատարելու է ջրային ռեսուրսների կառավարմանը, ինչպես փոխհամաձայնեցվել էր վարչապետ Փաշինյանի՝ Բրյուսել կատարած վերջին այցի ժամանակ: Ես առիթ կունենամ նաև այցելել Սևանավանքը՝ մի հուշարձան, որը եվրոպական մշակույթի վրա Հայաստանի հազարամյա ազդեցության ապացույց է:

Այսօր մենք քննարկեցինք նաև Լեռնային Ղարաբաղի չհանգուցալուծված հակամարտությունը: Եվրամիությունը քաջալերված է այս տարվա զարգացումների դինամիկայով և ժողովուրդներին խաղաղության պատրաստելու ու մարդասիրական խնդիրների վրա շեշտադրում կատարելու պատրաստակամությամբ: Մենք նաև կիսում ենք Մինսկի խմբի համանախագահների մտահոգությունը շփման գծի երկայնքով վերջին զոհերի ինչպես նաև էսկալացիոն հայտարարությունների վերաբերյալ: Երկու կողմերն էլ պետք է զսպվածություն ցուցաբերեն և միջոցներ ձեռնարկեն՝ վերականգնելու համար այն միջավայրը, որը նպաստավոր կլինի խաղաղության, իրական բանակցությունների համար: Հակամարտությունը ռազմական լուծում չունի, և այստեղ քաղաքական հանգուցալուծում է պետք, որը կհամապատասխանի միջազգային իրավունքի սկզբունքներին: Եվրամիությունը շարունակում է լիարժեքորեն աջակցել Մինսկի խմբի համանախագահների ջանքերին և շեշտադրությանը՝ գտնելու արդար և տևական հանգուցալուծում՝ ելնելով Հելսինկիի եզրափակիչ ակտի հիմնական սկզբունքներից: Եվրամիությունն արդեն սատարում է խաղաղության կառուցման գործողություններին և պատրաստ է սատարել ժողովուրդներին խաղաղության նախապատրաստելու միջոցառումներին:

Պարոն վարչապետ, թույլ տվեք ավարտեմ, վերստին ձեզ շնորհակալություն հայտնելով ջերմ ընդունելության համար: Ինձ քաջալերում և խրախուսում է Ձեր ղեկավարությամբ առաջընթացը, և ես ուզում եմ հավաստացնել, որ Եվրոպական միությունը շարունակելու է սերտորեն աշխատել Հայաստանի հետ և Ձեզ հետ՝ ի օգուտ բոլոր հայերի:

Շնորհակալություն: