Մեծ Բրիտանիան ԵՄ-ի կազմից դուրս կգա հոկտեմբերի 31-ից ոչ ուշ, չնայած Brexit-ի նոր հետաձգման հասնելու բրիտանական խորհրդարանի փորձերին: Այդ մասին հայտարարել է Միացյալ Թագավորության վարչապետ Բորիս Ջոնսոնը՝ Իռլանդիայի իր պաշտոնակից Լեո Վարադքարի հետ Դուբլինում կայացած համատեղ մամուլի ասուլիսի ժամանակ:
«Ինչպես ԵՄ-ում ամենուրեք հասկանում են, ներառյալ Դուբլինը, Brexit-ին նվիրված բանակցություններն ու բանավեճերն արդեն չափազանց երկար են շարունակվում: Այնտեղ ցանկանում են փակել այդ հարցը, և ես նույնն եմ ցանկանում: Մենք ԵՄ-ից դուրս կգանք հոկտեմբերի 31-ին, և ես վստահ եմ, որ խորհրդարանականները կհասկանան, որ դա իմաստուն որոշում է՝ հիմնված ժողովրդավարական հանրաքվեի արդյունքների հարգման վրա: Ինձ բնավ չի վախեցնում այն, ինչ կարող է տեղի ունենալ խորհրդարանում, քանի որ ես կարծում եմ, որ բրիտանական ժողովուրդը ցանկանում է, որ մենք գործարք կնքենք ԵՄ-ի հետ և հանրակցությունը լքենք հոկտեմբերի 31-ին»,-ասել է Ջոնսոնը՝ հավելելով, որ հավատում է «մինչև հոկտեմբերի 18-ը գործարքի հասնելու հնարավորությանը»:
