Պատերազմի՝ տնտեսությանը հասցրած վնասը համեմատելի է ՀՆԱ-ի մի քանի տարվա ծավալի հետ. կորցրել ենք գյուղատնտեսական նշանակության հողերի և էներգետիկ օբյեկտների մեծ մասը. ԼՂՀ պետնախարար

• 23.12.2020, 16:12
•  Աշխարհ,  ԼՂՀ

Tert.am

Հայաստանի և Ադրբեջանի միջև վերջին զինված հակամարտության ընթացքում Լեռնային Ղարաբաղի Հանրապետության տնտեսությանը հասցված վնասը համեմատելի է նրա ՀՆԱ-ի մի քանի տարիների ծավալի հետ: Այս մասին ՌԻԱ Նովոստի գործակալության հետ զրույցում տեղեկացրել է ԼՂՀ պետնախարար Գրիգորի Մարտիրոսյանը:

«Հակառակորդի հասցրած վնասը պարզապես հսկայական է: Այժմ աշխատանքներ են տարվում այն դրամական արտահայտությամբ գնահատելու համար, բայց արդեն կարող ենք ասել, որ դա համեմատելի է հանրապետության ՀՆԱ-ի մի քանի տարիների ծավալի հետ: Դա վերաբերում է հիմնականում այնպիսի ոլորտներին, ինչպիսիք են գյուղատնտեսությունը, էներգետիկան»,-ասել է Մարտիրոսյանը:

Պետնախարարի խոսքով՝  Լեռնային Ղարաբաղում վերջերս տեղի ունեցած ռազմական բախումից հետո հանրապետության բնակչությունը հայտնվել է «հումանիտար ճգնաժամի եզրին»: Ռազմական գործողությունների պատճառած վնասը առաջին հերթին ազդել է ենթակառուցվածքային օբյեկտների և քաղաքացիների մասնավոր սեփականության վրա, տեղեկացրել է Մարտիրոսյանը:

«Այն բանի պատճառով, որ ռազմական գործողությունների հետևանքով տարածքների մեծ մասը անցել է հակառակորդին կամ գրավվել է, մեր տնտեսությունը կորցրել է գյուղատնտեսական նշանակության հողերի և էներգետիկ օբյեկտների մեծ մասը: Էլ չենք խոսում այն մասին, որ քաղաքացիների ունեցվածքի մեծ մասը՝ անշարժ գույք, անձնական և գյուղատնտեսական սարքավորումներ, նույնպես ոչնչացվել է, կամ մնացել է մեր վերահսկողությունից դուրս »,-ասել է պաշտոնյան:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։