Այս ամբողջ պրոցեսի մեջ երկու հարց կա․ որ ես ճանաչում եմ Արա Սաղաթելյանին, ու այն, որ օգտագործել եմ VPN համակարգ. Կարեն Բեքարյանը՝ կեղծ օգտատիրոջ քրգործի մասին

• 22.02.2021, 15:22
•  Աշխարհ,  Հայաստան

Իրականում քննությունը, նախաքննության պրոցեսը և հարուցված գործն իրենց մեջ ունեն զրո տրամաբանություն, մեղմ ասած, չես հասկանում գործի էությունը, չես հասկանում՝ ի՞նչ է հետապնդվում, տեսնում ես, որ չկա տրամաբանություն և պարզ հասկանում ես, որ մոտիվացիան լրիվ ուրիշ տեղ է. դա ինձ համար շատ հստակ է և լրացուցիչ համոզվել պետք չէր՝ գործի նյութերին ծանոթանալուց հետո։ Դուրս գալով դատարանից՝ լրագրողներին ասաց «Քառյակ մեդիա» ընկերության համահիմնադիր, քաղաքագետ Կարեն Բեքարյանը, փոխանցում է Tert.am-ը:

«Օրինակ` պետական մարմինների ինտերնետ ռեսուրսներ հայաստանյան IP- ներից հնարավոր չէր մուտք գործել, հետևաբար՝ եթե ուզում ես գործընթացները հասկանալ, իսկ ոչ մեկի համար գաղտնիք չէ, որ ես զբաղվում եմ արտաքին քաղաքականությամբ, ու չես կարող ուղղակիորեն այդ ինֆորմացիան չունենալ, չտիրապետել և քո վերլուծություններում դրանք չներառել: Եվ երբ իմացա, որ կա համակարգ, որ տալիս է հնարավորություն այդ արգելքը շրջանցելու, և ադրբեջանական կողմը չի տեսնում, որ իր մոտ մուտք գործողը հայաստանյան IP է, բնականաբար, այդ համակարգից օգտվել եմ, այսինքն` այդտեղ ես որևէ արհեստական բան չեմ տեսնում»,- նշեց նա:

«Ես կարծում եմ, որ նախաքննության ցանկացած մարմին, նախաքննությամբ զբաղվող ցանկացած անձ, մինչ այդ հարցին ձեռնամուխ լինելը պետք է առաջնահերթ պատկերացում կազմի ծրագրային համակարգերից, VPN ծրագրային համակարգի և հավելվածի աշխատանքի մեթոդների սկզբունքների մասին,  կարող է մասնագետներից օգնություն հայցի և ունենա համապատասխան տեղեկատվություն: Այդ պարզագույն գիտելիքներն ունենալու դեպքում այս հարցերը չէին առաջանա, որովհետև այս ամբողջ պրոցեսի մեջ երկու հարց  կա, որ ես ճանաչում եմ Արա Սաղաթելյանին, ու այն, որ ես օգտագործել եմ VPN համակարգ»:

Անդրադառնալով հարցին, թե արդյո՞ք ճանաչում է Արամ Սարգսյանին, որը կալանավորվել է, Բեքարյանը պատասխանեց, որ չի հասկացել, թե խոսքը ո՞ւմ է  վերաբերում, ունի շատ ծանոթ Արամներ, և ազգանունը ոչինչի չի հուշել. «Եթե ասեմ՝ չեմ ճանաչում, կարող է պարզվել իմ ճանաչած Արամներից մեկն է, բայց եթե ասեմ՝ իդենտիֆիկացրել եմ խոսքը, թե ում է վերաբերում՝ չէ»: