Կոչ ենք անում հստակեցնել անհայտ կորածների ճակատագիրը, հեշտացնել ռազմագերիների ազատ արձակման գործընթացը. Համայն Ռուսիո պատրիարք

• 13.10.2021, 20:09
•  ԵԱՏՄ,  Տարածաշրջան,  Աշխարհ,  Հայաստան,  ԼՂՀ

2021 թվականի հոկտեմբերի 13-ին Մոսկվայի Դանիլովի վանքում տեղի ունեցավ Համայն Ռուսիո պատրիարք Կիրիլի, Ամենայն Հայոց կաթողիկոս Գարեգին Երկրորդի և Կովկասի մահմեդականների գրասենյակի (ՇՄԿ) նախագահ շեյխ-ուլ-իսլամ Ալլահշուքյուր Փաշազադեի եռակողմ հանդիպումը: Ինչպես հայտնում է Մոսկվայի և Համայն Ռուսիո պատրիարքի մամուլի ծառայությունը, հանդիպումից հետո Վեհափառ հայրապետ Կիրիլը հանդես է եկել հետևյալ հայտարարությամբ.

«Մենք նոր ավարտեցինք Ռուսաստանի, Ադրբեջանի և Հայաստանի հոգևոր առաջնորդների եռակողմ հանդիպումը, որը շարունակում է խաղաղության բանակցությունների ավելի քան 30-ամյա ավանդույթը՝ միջնորդավորված Ռուս ուղղափառ եկեղեցու առաջնորդների կողմից:

Շնորհակալ եմ Ամենայն Հայոց պատրիարք-կաթողիկոս Գարեգին Երկրորդին և Կովկասի մահմեդականների գրասենյակի նախագահ շեյխ-ուլ-իսլամ Ալլահշուքյուր Փաշազադեին՝ իրենց պատրաստակամության համար հանդիպել և դեմ առ դեմ քննարկել այնպիսի բարդ խնդիրները, որոնք հուզում են մեր երկու եղբայրական ժողովուրդների բնակիչներին և կրոնական համայնքներին:

Մենք համոզված ենք, որ մեր կրոններն ունեն եզակի խաղաղարար ներուժ, հատկապես այնպիսի նուրբ ու զգայուն ոլորտում, ինչպիսին են ազգամիջյան հարաբերությունները: Անկախ նրանից, թե որքան դժվար են հայ-ադրբեջանական հարաբերություններն այս փուլում, մենք հավատում ենք, որ հենց Աստծո հանդեպ հավատն ու սերը կարող են օգնել բուժել երկար տարիների ողբերգական դիմակայության հասցրած վերքերը: Սա շատ դժվարին ճանապարհ է, այն պահանջում է հոգևոր իմաստություն և հեռատեսություն: Կովկասը միշտ հայտնի է եղել իր ժողովուրդների, լեզուների և մշակույթների հսկայական բազմազանությամբ: Ադրբեջանցի և հայ ժողովուրդների համար միասին ապրելուց բացի այլ ապագա չկա: Այսօր հատկապես կարևոր է վերականգնել մարդկանց վստահությունը միմյանց նկատմամբ, կրկին սովորել հարևանին ընկալել հարգանքով և փոխօգնության պատրաստակամությամբ:

Նման կոչի բանալին կրոնական սրբավայրերի, պատմական հուշարձանների և գերեզմանատների նկատմամբ հարգանքն է, այլ հավատքի մարդկանց կրոնական զգացմունքների հարգանքը, մահացածների հիշատակի ուշադիր պահպանումը: Կրոնական առաջնորդները կոչված են օգտագործել իրենց հեղինակությունը՝ կրոնների և ժողովուրդների միջև բարիդրացիական մթնոլորտ ստեղծելու և պահպանելու համար:

Մենք կոչ ենք անում հստակեցնել անհայտ կորածների ճակատագիրը, հեշտացնել ռազմագերիների ազատ արձակման գործընթացը և կանխել խաղաղ բնակիչների կյանքին սպառնացող զենքի չարտոնված օգտագործումը:

Ապագայում անհրաժեշտ է ամեն կերպ ձգտել խուսափել ատելության խոսքից, զերծ մնալ հակամարտության գոտում ռազմական գործողությունների կոչերից: Մենք կոչ ենք անում երիտասարդներին չտրվել ագրեսիայի և արմատականության ոգուն, առաջին հերթին խաղաղություն փնտրել: Կրոնական առաջնորդները պատրաստ են իրենց լուման ներդնել Ադրբեջանի և Հայաստանի ժողովուրդների հաշտեցման գործում`ի շահ և բարգավաճման ներկա և ապագա սերունդների:

Ռուս ուղղափառ եկեղեցին, իր հերթին, աղոթում է իր մտերիմ երկու ժողովուրդների հաշտեցման համար և պատրաստ է շարունակել անել հնարավորը`Հարավային Կովկասում տևական և արդար խաղաղություն հաստատելու համար»: