Թուրքական գյուղմթերքի ներմուծման տեսանկյունից սահմանը բաց է, այսինքն թուրքական ապրանքը անարգել գալիս է ՀՀ. Քերոբյան (News.am)

• 15.03.2023, 19:50
•  Տարածաշրջան,  Աշխարհ,  Հայաստան

Թուրքական գյուղմթերքի Հայաստան ներմուծման տեսանկյունից Թուրքիայի հետ սահմանը բաց է, այսինքն թուրքական ապրանքը անարգել գալիս է Հայաստան: Այս մասին NEWS.am-ի հետ զրույցում նշել է էկոնոմիկայի նախարար Վահան Քերոբյանը՝ անդրադառնալով հարցին, թե հնարավո՞ր է, որ հայ-թուրքական սահմանը բացվելու դեպքում թուրքական էժան գյուղմթերքը ներկրվի Հայաստան և տեղացի արտադրողը չդիմանա այդ մրցակցությանը:

«Անցյալ տարի Հայաստանի և Թուրքիայի միջև ապրանքաշրջանառությունը 300 մլն դոլարից ավել է եղել, որը ռեկորդային ցուցանիշ է: Հիմնականում ներմուծումն է եղել և հիմնականում գյուղմթերք ենք ներմուծել: 2019-2020-ին ապրանքաշրջանառությունը թուրքիայի հետ եղել է մոտ 200 մլն դոլար: Այսօր այդ ապրանքների համար որևէ արգելք չկա: Այո, այդ ապրանքը գալիս է Վրաստանի միջոցով, բայց այնուամենայնիվ, դրանք չնչին տոկոսներ են: Այսօր կառավարությունը բազմաթիվ ծրագրեր է իրականացնում, որոնք ուղղված են գյուղատնտեսության արտադրողականության բարձրացմանը:

Այո, ընհանուր առմամբ Հայաստանի տնտեսության արտադրողականությունը 2021-ին կազմել է մոտ 7 դոլար մեկ մարդու մեկ ժամվա ստեղծած ՀՆԱ-ի դիմաց: Դա մոտ 7 անգամ ավելի քիչ է քան Տնտեսական համագործկցության և զարգացման կազմակերպության 37 երկրների միջին ցուցանիշը: Իսկ գյուղատնտեսության մեջ արտադրողականությունը շատ ավելի շատ է զիջում: Եթե, օրինակ, IT ոլորտում մեր տարբերությունը զարգացած երկրներից կազմում է 3-4 անգամ, ապա արդյունաբերության որոշ ոլորտներում 7 անգամ, ապա գյուղատնտեսության մեջ տասնյակ անգամ: Գլխավոր խնդիրը հողերի խիստ մասնատվածություն է և ջրային համակարգի հասանելիության սահմանափակ լինելը: Այս երկու հարցերի լուծումն է, որ պետք է բերի հողերի խոշորացումը և ջրային համակարգի զարգացումը, որը մեր պլաններում է»,-հայտարարել է Քերոբյանը: