Ոչ ոք իրավունք չունի միջամտելու Պեկինի և Մոսկվայի երկկողմ հարաբերություններին․ Չինաստանի ԱԳՆ

• 21.04.2023, 14:42
•  ԵԱՏՄ,  Ամերիկա,  Ասիա,  Աշխարհ

EADaily

Երրորդ կողմերն իրավունք չունեն միջամտելու Չինաստանի և Ռուսաստանի երկկողմ հարաբերություններին, ուրբաթ ճեպազրույցի ժամանակ ասել է Չինաստանի ԱԳՆ պաշտոնական ներկայացուցիչ Վան Վենբինը։

«Չինաստանն ու Ռուսաստանը միշտ հավատարիմ են մնացել չմիավորվելու, առճակատումից խուսափելու և երրորդ կողմերին չթիրախավորելու սկզբունքներին և զարգացրել են խոշոր երկրների միջև նոր տեսակի հարաբերություններ ՝ հիմնված փոխադարձ հարգանքի, խաղաղ գոյակցության և փոխշահավետ համագործակցության վրա»,- ասել է դիվանագետը։

Վան Վենբինն ընդգծել է, որ Պեկինի և Մոսկվայի հարաբերությունները արմատապես տարբերվում են «փոքր շրջանակներից» և «դաշինքային առճակատումից», որով զբաղվում է ԱՄՆ-ն։

«Ոչ մի պետություն իրավունք չունի միջամտելու (Ռուսաստանի և Չինաստանի հարաբերություններին)»,- ասել է նա։

Դիվանագետը նշել է, որ Չինաստանը միշտ օբյեկտիվ և արդար դիրքորոշում է ունեցել ուկրաինական ճգնաժամի հարցում, ակտիվորեն խթանել է խաղաղ բանակցությունները և կառուցողական դեր խաղացել ճգնաժամի քաղաքական կարգավորման գործում։

Ավելի վաղ ԱՄՆ ֆինանսների նախարար Ջանեթ Յելենը սպառնացել էր Չինաստանին «ծանր հետևանքներով», եթե վերջինս Ռուսաստանին աջակցի ուկրաինական հակամարտությունում։ Վաշինգտոնը կշարունակի Պեկինին «շատ հստակ կերպով փոխանցել ԱՄՆ-ի դիրքորոշումը և նրա իրավասության տակ գտնվող ընկերություններին, ցանկացած խախտման հետևանքը ծանր կլինի», - ասել է Յելենը։