Քննարկվում է ՌԴ-ին Հվ. Օսիայի ինտեգրման մակարդակը բարձրացնելու մասին պայմանագրի նախագիծը

• 27.01.2015, 13:36
•  ԵԱՏՄ,  Տարածաշրջան,  Աշխարհ

Օրերս հարավօսական լրատվամիջոցները տարածեցին Հարավային Օսիայի և Ռուսաստանի Դաշնության միջև դաշինքի և ինտեգրման պայմանագրի նախագիծ, ինչը որոշակի ակտիվություն առաջ բերեց հասարակական և քաղաքական շրջանակներում: Ինչպես և Աբխազիայում, այստեղ ևս առանձնացավ որոշակի հատված, ըստ որի՝ նման նախագիծը չի բխում հանրապետության շահերից, սակայն, ի տարբերություն աբխազական նախադեպի, այս պարագայում դժգոհողները ինտեգրման առավել բարձր մակարդակ են պահանջում:

Փաստաթուղթը հրապարակել է նախագահին կից քաղաքական խորհրդի կողմից: Այն տրամադրել է ռուսական կողմը՝ ներառելով հարավօսական կողմի մոտեցումները: Նախատեսվում է, որ այն դեռ պետք է քննարկվի համատեղ հանձնաժողովի կողմից:

Ավելի քան երկու տասնյակ հոդվածներից կազմված պայմանագրի նախագիծը նախատեսում է Ռուսաստանի և Հարավային Օսիայի միջև համագործակցության առավելագույն խորացում` մասնավորապես անվտանգության և տնտեսական ոլորտներում:

Ըստ նախագծի՝ կողմերը պետք է իրականացնեն համաձայնեցված արտաքին քաղաքականություն և ձևավորեն պաշտպանության և անվտանգության միասնական տարածություն: Հարավային Օսիայի անվտանգության և պաշտպանության, այդ թվում՝ սահմանի պաշտպանության գործառույթները պետք է իրականացնի Ռուսաստանը: Հարավային Օսիայի զինված ուժերը և պետանվտանգության մարմինները ներառվելու են ռուսական զինված ուժերի և հատուկ ծառայությունների կազմում:

Կողմերից որևէ մեկի վրա հարձակումը համարվում է հարձակում նաև մյուսի վրա, սակայն նման պայմաններում Հարավային Օսիայի տարածքում զինված ուժի կիրառումը պետք է համաձայնեցվի չճանաչված հանրապետության նախագահի հետ:

Պայմանագիրը նախատեսում է նաև մարդկանց և ապրանքների տեղաշարժի պայմանների դյուրացում, երկու երկրների միջև սահմանները պետք է վերացվեն, իսկ Հարավային Օսիայի մաքսային մարմինները պետք է մտնեն ՌԴ մաքսային մարմինների կազմի մեջ:  

Ռուսաստանը իր հերթին պետք է պարտավորվի հեշտացնել Հարավային Օսիայի քաղաքացիների՝ առանց սեփական քաղաքացիությունից հրաժարվելու ռուսական քաղաքացիություն ձեռք բերելու գործընթացը: Մոսկվան նաև պարտավորվում է նպաստել  պետական և տեղական ինքնակառավարման մարմինների աշխատակիցների աշխատավարձերի աստիճականական բարձրացմանը, ինչպես նաև կենսաթոշակի մակարդակի  հավասարեցմանը Հյուսիս-Կովկասյան դաշնային շրջանի մակարդակին:

ՌԴ և Հրավային Օսիայի միջև պայմանագիրը նախատեսվում է կնքել 25 տարով, 10 տարի երկարաձգման հնարավորությամբ: Ինչպես տեսնում ենք, տվյալ նախագիծը բավական նման է ռուս-աբխազական պայմանագրի նախագծի ռուսական տարբերակին, որը, սակայն, զգալի փոփոխությունների ենթարկվեց: Հարավային Օսիայում իրավիճակն այլ է: Ի տարբերություն Աբխազիայի՝ այստեղ քաղաքական ուժերի հիմնական նպատակներից մեկը Ռուսաստանի կազմում Հարավային և Հյուսիսային Օսիաների միավորումն է: Ավելին, այնպիսի պայմաններում, երբ հանրապետւթյան բյուջեի շուրջ 95%-ը հենց ռուսական հատկացումերն են, օս ժողովրդի երկու հատվածների՝ ՌԴ կազմում միավորման գաղափարը բավական տրամաբանական է դառնում: Պայմանագիրը, սակայն, միավորման մասին դրույթներ չի պարունակում, ինչը, թերեւս, պայմանավորված է ներկայիս աշխարհաքաղաքական գործոններով: Ռուսական կողմը այս պահին թերևս առավել նպատակահարմար է գտել բավարարվել միայն բարձր մակարդակի ինտեգրմամբ, ինչը հաջողությամբ արտահայտված է պայմանագրի դրույթներում:

Պայմանագրի նախագիծն այժմ գտնվում է քննարկման փուլում, սակայն մինչև ստորագրումը՝ 2015թ-ի փետրվարի 10-ը, բովանդակային զգալի փոփոխությունները քիչ հավանական են թվում: