Փաստաբան. Գյուլենի դատական հետապնդումն ապօրինի է

• 25.02.2015, 15:20
•  Ամերիկա,  Տարածաշրջան,  Աշխարհ

Ստամբուլի դատարանը իսլամիստ աստվածաբան Ֆեթուլլահ Գյուլենի ձերբակալության կրկնակի հրաման է արձակել: Ինչպես հայտնում է TASS-ը, հղում անելով Khabertjurk հեռուստաընկերությանը, այս որոշումը կայացվել է երկրի ղեկավարության հեռախոսները գաղտալսելու գործով կատարվող հետաքննության շրջանակներում: Նախկինում թուրքական դատարանն արդեն մեկ անգամ Գյուլենին ձերբակալելու հրաման էր արձակել՝ նրան մեղադրելով հանցավոր խմբավորում ստեղծելու մեջ:

Ընդհանուր առմամբ, գաղտնալսման գործով ավելի քան 27 մարդ է ձերբակալվել: Նրանք մեղադրվում են ավելի քան 100 մարդու, այդ թվում նաև Թուրքիայի նախագահ Ռեջեփ Թայիփ Էրդողանի և վարչապետ Ահմեդ Դավութօղլու հեռախոսների ապօրինի գաղտնալսման մեջ: Այս գործընթացը «զուգահեռ կառույցի» դեմ Անկարայի պայքարի բաղկացուցիչ մասն է կազմում:

Ֆեթուլլահ Գյուլենի փաստաբան Նուրուլլահ Ալբայրաքը՝ ի պատասխան թուրքական լրատվամիջոցների տարածած վերոնշյալ տեղեկատվության, հայտարարել է, որ քրեական դատավարության օրենքների համաձայն դատարանը չի կարող ձերբակալման հրաման արձակել, քանի դեռ մեղադրյալից համապատասխան կարգով չեն պահանջել ներկայանալ դատարան: Ինչպես հայտնում է Today’s Zaman-ը, Նուրուլլահ Ալբայրաքը նաև նշել է, որ Գյուլենը, ով 1999 թվականից բնակվում է ԱՄՆ-ում, և ում հասցեն հայտնի է հանրությանը, պետք է կանչվի թուրքական և ամերիկյան իշխանությունների կողմից ցուցմունք հանձնելու համար համաձայն երկու երկրների միջև ստորագրված իրավական պայմանագրերի: Նա նաև ընդգծել է, որ դատարանը կարող է ձերբակալման հրաման արձակել միայն այդ դեպքում, եթե մեղադրյալը չի պատասխանել դատարան ներկայանալու պահանջին: Ընդ որում, հրամանըը պետք է ուղարկվի մեղադրայի անմիջական հասցեին:

Գյուլենի փաստաբանը նաև հայտարարել է, որ ձերբակալման հրամանն անընդունելի է միջազգային իրավունքի տեսանկյունից: Նուրուլլահ Ալբայրաքը շեշտել է, որ դատարանի որոշումը ցույց է տալիս, որ Թուրքիայի դատական համակարգն օգտագործվում է որպես ճնշման միջոց այն մարդկանց և խմբերի դեմ, ովքեր չեն կիսում իշխող կառավարության հայացքները: «Մենք կարծում ենք, որ երբ այս մութ շրջանն ավարտվի, այս ապօրինի մեթոդները Սահամանադրությանը համապատասխան կդատապարտվեն», - եզրափակել է Գյուլենը: