Թրամփը պատրաստ է օգնել լուծել նավթի գների շուրջ ՌԴ-ի և Սաուդյան Արաբիայի միջև «պատերազմը»

• 01.04.2020, 15:47
•  Աշխարհ

AP

ԱՄՆ նախագահ Դոնալդ Թրամփը հայտարարել է, որ պատրաստ է օգնել լուծել նավթի գների շուրջ արագ թափ հավաքող «պատերազմը» Ռուսաստանի և Սաուդյան Արաբիայի միջև, որն ավելի վաղ նավթի գների կրիտիկական անկման էր հանգեցրել, հաղորդում է France24-ը:

Թրամփը հայտնել է, որ հեռախոսազրույց է ունեցել Ռուսաստանի նախագահ Վլադիմիր Պուտինի և Սաուդյան Արաբիայի թագաժառանգ Մուհամմադ Իբն Սալմանի հետ` նավթի գների անկումը դադարեցնելու նպատակով: «Երկու երկները քննարկում են դա: Եվ ես կմիանամ համապատասխան ժամանակ, եթե դրանում անհրաժեշտություն լինի»,- ասել է Միացյալ Նահանգների նախագահը:

Հիշեցնենք, որ Ռուսաստանի և Միացյալ Նահանգների նախագահներ Վլադիմիր Պուտինը և Դոնալդ Թրամփը հեռախոսազրույցի ընթացքում քննարկել են կորոնավիրուսի համաճարակի դեմ պայքարի միջոցները: Կրեմլի մամուլի ծառայության հաղորդմամբ` խոսակցությունը նախաձեռնել էր ամերիկյան կողմը:

Կարծիքների փոխանակում է տեղի ունեցել նաև նավթի համաշխարհային շուկայի ներկայիս վիճակի վերաբերյալ: Պայմանավորվածություն է ձեռք բերվել ռուս-ամերիկյան խորհրդակցություններ անցկացնել այս թեմայով էներգետիկանյի նախարարությունների մակարդակում:

Ավելի ուշ լրատվամիջոցները հայտնել էին, որ ԱՄՆ-ի և Ռուսաստանի առաջնորդների հեռախոսազրույցից հետո նավթի գները սկսել են կայունանալ:

Նշենք, որ Ռուսաստանի Դաշնության նախագահի մամուլի քարտուղար Դմիտրի Պեսկովը հայտարարել էր, որ Ռուսաստանը և Սաուդյան Արաբիան որևէ պատերազմ չեն մղում նավթի գների պատճառով: