Ստեփանակերտում սկսել է գործել Ռուսաստանի ՊՆ Հատուկ նշանակության բժշկական ջոկատը

• 02.12.2020, 11:45
•  ԼՂՀ

Տեղի մոտ 70 բնակիչներ բուժօգնության համար դիմել են Ստեփանակերտում տեղակայված Ռուսաստանի պաշտպանության նախարարության Հատուկ նշանակության բժշկական ջոկատի (ՀՆԲՋ) մասնագետներին, հայտնում է NEWS.am։

Բնակիչների դաշտային հոսպիտալ դիմելու պատճառը կապված է հիմնականում սիրտ-անոթային և էնդոկրինային հիվանդությունների սրման հետ, դրանից բացի ռազմական բժիշկներին են դիմել ստոմատոլոգիական օգնություն ցուցաբերելու համար, փոխանցում են ՌԴ պաշտպանության նախարարությունից։

ՀՆԲՋ ստորաբաժանումների կազմում կան 100-ից ավելի ռազմաբժշկական մասնագետներ, այդ թվում՝ ռազմական վիրաբույժներ, անեսթեզիոլոգ-ռեանիմատոլոգներ, թերապևտներ և համաճարակաբաններ։

Բժիշկները, միջին և կրտսեր բուժանձնակազմը մշտական պատրաստկանության վիճակում են՝ ցուցաբերելու առաջին բժշկական, որակյալ և մասնագիտացված բուժօգնություն։

Յուրաքանչյուր ՀՆԲՋ կազմի մեջ են մտնում լաբորատոր-ախտորոշման բաժանմունքը, որը կարող է օրական անցկացնել մինչև 80 ռենտգեն, ֆլյուրոգրական և ՈՒՁ հետազոտություններ, վիրակապարանը՝ օրական մինչև 40 պացիենտի վիրաբուժական օգնություն ցուցաբերելու հնարավորությամբ, ինչպես նաև վիրահատական-վերակենդանացման ախտորոշիչ մոդուլը՝ ինտենսիվ թերապիայի հիվանդասենյակով։

ՀՆԲՋ մասնագետները կազմակերպելու են խաղաղապահ զորախմբի բժշկական ապահովումը և անհրաժեշտ բուժօգնություն են ցուցաբերում Լեռնային Ղարաբաղի բնակչությանը։ 

Ռազմական բժիշկներն ավելի վաղ ռազմատրանսպորտային ավիացիայի Իլ-76 օդանավերով Խաբարովսկի օդանավակայաններից տեղափոխվել էին Հայաստանի Հանրապետություն, իսկ Երևանից՝ Լեռնային Ղարաբաղ։

Արևելյան ռազմական օկրուգի Հատուկ նշանակության բժշկական ջոկատը Լեռնային Ղարաբաղում տեղակայելու համար ընդհանուր տեղափոխվել է 122 զինծառայող, 54 միավոր ավտոմեքենա և հատուկ տեխնիկա, 66 տոննա նյութական միջոցներ։