Վերջին ժամանակներս ադրբեջանցիների դրսևորած ակտիվությունը չի կարող անպատասխան մնալ. Արցախի ԱԺ նախագահ

• 30.03.2021, 18:16
•  ԼՂՀ

Արցախի ԱԺ նախագահ Արթուր Թովմասյանն այցելել է արտաքին գործերի նախարարություն, հանդիպել նախարար Դավիթ Բաբայանի հետ:

Քննարկվել են երկրի արտաքին քաղաքականության գերակայություններին վերաբերող հարցեր: Արթուր Թովմասյանն անդրադարձել է Հայաստանի արտաքին գործերի նախարար Արա Այվազյանի հետ հանդիպմանը, որի ընթացքում հիմնական թեզերը, ըստ խորհրդարանի ղեկավարի, համահունչ էին նոր իրողություններին:

«Այսօր Արցախի անվտանգությունը թիվ մեկ խնդիրն է, վերջին ժամանակներս ադրբեջանցիների դրսևորած ակտիվությունը չի կարող անպատասխան մնալ: Խոսքը վերաբերում է այն դեպքերին, երբ հայկական մեքենաները քարերով ջարդվում էին»,- ասել է Արթուր Թովմասյանը:

Խոսքը միջազգային ատյաններում օրակարգային այս և այլ հարցերի բարձրացման անհրաժեշտության մասին է:

ԱԺ նախագահը կարևորել է ԵԱՀԿ Մինսկի խմբի շրջանակներում ադրբեջանա-ղարաբաղյան հակամարտության կարգավորման գործընթացը, ինչպես նաև նշել է տարբեր երկրների, մասնավորապես Ռուսաստանի Դաշնության հետ հարաբերությունների հետագա զարգացման և խորացման կարևորությունը:

Արցախի Հանրապետության արտաքին գործերի նախարար Դավիթ Բաբայանը նշել է խորհրդարանական դիվանագիտության՝ որպես արտաքին քաղաքականության կարևոր բաղադրիչներից մեկի կարևորությունը: «Մենք պետք է օգտագործենք բոլոր ներքին ռեսուրսները, ստեղծենք ամուր թիկունք, որպեսզի արտաքին ճակատում ուժեղ լինենք»,- ընդգծել է արտգործնախարարը: