Փետրվարից էլեկտրաէներգիայի սակագինը ՀՀ-ում կթանկանա 4,7 դրամով

• 23.12.2021, 17:18
•  Հայաստան

Հայաստանում էլեկտրաէներգիայի սակագինը կթանկանա. այս մասին հայտարարել է ՀԾԿՀ սակագնային քաղաքականության վարչության պետ Աշոտ Ուլիխանյանը։

«Եթե էլեկտրաէներգիայի գործող սակագները պահպանեինք, ապա համակարգում կունենայինք մոտ 23,8 միլիարդ դրամի ֆինանսական ճեղքվածք։ Եթե սակագնի բարձրացում տեղի չունենար, ապա այս ֆինանսական ճեղքվածքի պատճառով եկող տարի խնդիրներ կունենայինք անխափան և հուսալի էլեկտրամատակարարում ապահովելու հետ կապված»,- լրագրողների հետ զրույցում էլեկտրաէներգիայի սակագնի թանկացման պատճառները ներկայացրեց Աշոտ Ուլիխանյանը։

«Միջին կշռված սակագինը 4,7 դրամով է ավելանում։ Ըստ լարումների՝ տարբերակված գներ գոյություն ունեն։ Բոլոր սպառողների համար միջին գինը մոտ 1 ԿՎՏժ-ի համար 41 դրամ է ստացվում և դա 4,7 դրամով պետք է ավելանա»,-նշեց Ուլիխանյանը։

ՀԾԿՀ ներկայացուցիչը տեղեկացրեց՝ դեկտեմբերի 29-ին հանձնաժողովի նիստում համապատասխան որոշում կայացնելու դեպքում նոր սակագներն ուժի մեջ կմտնեն փետրվարի 1-ից։

Ուլիխանյանը պարզաբանեց նաև, որ թանկացումների հայտը էլեկտրաէներգիա արտադրող ընկերությունները չեն ներկայացրել, դա ՀԾԿՀ-ի նախաձեռնությունն է։

Հիշեցնենք՝ ՀԾԿՀ-ում ընթանում է էլեկտրաէներգետիկական համակարգի սակագների հետ կապված աշխատանքային քննարկում՝  սպառողների շահերը պաշտպանող կազմակերպությունների և համակարգի ընկերությունների ներկայացուցիչների մասնակցությամբ։